Adam dönüb tanrı olmaz, a zalım
Elə bilmə səndən sonra gün doğmadı dağlara.
Elə bilmə səndən sonra qar su olub axmadı.
Elə bilmə səndən sonra tərk edənlər olmadı
Elə bilmə tək sən oldun aldadan bu axmağı!
Bu yollarda az olmadı səfil kimi gəzdiyim
Bu yollarda daş qalmadı dizlərimə dəyməyən.
Bu yollarda qarışqalar, bu yollarda sərçələr
Bu yollarda ağaclar da dərd ortağım oldular.
Bu yollarda, bu bozluqda tək sən oldun gözlərimə dəyməyən.
Adam birdən birə dönüb tanrı olmaz, a zalım
Adam birdən birə belə yoxa çıxmaz, sevdiyim..
Adam birdən birə dönüb hava olmaz, a zalım
Adam birdən birə belə aslı etməz adamı!
Şair doğulmuşam
Gözlərini buğda dənəsi kimi əkərsən ,
ürəyindən eşq cücərər.
Tənhalaşdıqca dəhşətləşər gecələr
Sevərsən təhlükəsizləşər küçələr...
Getdiyin yerdə gözlənilirsənsə
qarşından keçən pişiyin rəngini görməzsən.
Sevərsənsə ən yoxsul halında
özündən zənginini görməzsən...
Başıbatmış məmləkətdə özün olmaq çətindir.
Mən , sən olmağı seçdim...
Bütün vücudumla sənə hopdum
yığışıb ürəyinə köçdüm...
Sən bütün vücudunla , bitmiş bir fikirsən !
Bütün mənası , gözlərində cəmlənən
bir misralıq şeirsən...
Səni oxumaq üçün yox , yazmaq üçün şair doğulmuşam..