Kamakailan ko lang napagtanto na masuwerte pala ako. Hindi dahil mayaman ako sa pera - kundi dahil mayaman pala ako sa mga bagay na hindi nabibili ng pera.
Marami akong dapat ipagpasalamat sa buhay, katulad ng pagkakaroon ng buong pamilya (idagdag na natin na mababait ang aking mga magulang at kapatid), lahat kami ay malulusog, meron din akong maayos na trabaho na nakakatulong sa mga gastusin ko sa araw araw etc,. Higit pa sa mga ito, ang isa sa pinagmamalaki ko sa aking mga kaibigan at kakilala ay ang pagiging malapit ng bahay namin sa mga natural na yaman tulad ng dagat.
Noong bata pa ako ay hindi ko pinapansin o pinapahalagahan ang dagat ng Estanza, siguro dahil lagi ko naman itong napupuntahan kahit kelan ko naisin. Ang laging pumapasok sa isip ko tuwing nakikita ko ang dagat na ito ay ang alaala na pagpipilit ng tatay ko sa akin ng matutong lumangoy. Noon ay takot na takot ako kaya siguro simula noon ay medyo iniwasan ko na ang pagpunta sa dagat.
Ngunit ang pagtingin ko sa dagat na ito ay nagbago simula ng napadpad ako sa Maynila. Ang dagat na dati kong iniiwasan at hindi pinapansin ang siyang naging una kong gustong puntahan tuwing bumabalik ako sa Pangasinan. Yung tipong hindi makukumpleto ang bakasyon ko kung hindi ko nabibisita ang dagat.
Masayang isipin na abot kamay ko lang ang dagat ngunit nakakalungkot tignan na pagpunta ko doon ay naguumpisa nang maging madumi ang paligid ng dagat namin. May mga plastic, diaper, bote at kung ano ano pa sa paligid ng dagat. Hindi ko lubos maisip kung bakit hindi man lang marunong magtapon ng basura ang mga taong bumibisita dito.
Pero alam mo ba? May kasalanan din ako. Dahil hindi ko man lang magawang pulutin ang mga basurang ito. Sa totoo lang, hanggang ngayon binabagabag pa din ako ng konsensiya ko dahil wala akong ginawa. Hindi ako kumuha ng sako at pumulot ng mga basura sa tabing dagat.
Kaya para sa ikatatahimik ng konsensya ko. Pinapangako ko na pagbalik ko sa Pangasinan, sa abot ng aking makakaya pupulutin ko lahat ng basura na makikita ko sa dagat namin. Pangako yan (tinataga ko sa blockchain). Para sa mga batang nasa larawan na 'to.