Unsay Kamatuoran sa Kinabuhi?
Sa usa ka pagpamilok sa mata
Mga katuigan sa kinabuhi milabay
Panahon sa mga kasakit
Maingon man ang kalipay, nahanaw.
Atong mga mahal sa kinabuhi
Mangabot ug mawala
Apan ang kalibutan wala mihunong
Sa gihapon kita nagapadayon.
Ang kinabuhi dili sayon
Anaa diri ang mga kasakit
Napuno sa panahon nga kinahanglan
Panahon nga dili nato ginatagad.
Nagbarog kita sa atong kaugalingon
Apan sa gihapon wala kaplagi ang dalan
Sa mga kagabhion nga puno sa mga luha
Maingon man ang kaadlawon sa bag-ong adlaw.
Karon sa hamtong nga pangidaron
Tin-aw na natong natino
Mga butang nga para kanato halangdon
Dili mao ang hinungdan nganon ania kita diri.
Image Source(direct link to img)
Pilan na ka mga butang
Atong gituyo nga mabatnan
Wala nakahimo kanatong kumplete
Sa gihapon wala kitay maayong pagbati.
Ang mga kabalaka ug kahadlok
Nga midangat kanato sa matag adlaw
Sa tumoy niining tanan
Mahanaw ug mawala lang gilayon.
Apan bisan unsaon nato pagkab-ot
Sa uban kung gikinahanglan
Mao ang tinuod nga sukdanan
Sa atong mga kalampusan
Apan unsa gayud ang halangdon
Mao ang opinyon batok sa atong kaugalingon
Tinuod man o dili
Kita mao ang pinaka nga atong makab-ot
Pipila pa ka mga katarung
Ug gugma ang angay natong igapadayag
Ayha moingon ang Ginoo kanato
Niabot na ang imong panahon.
