PAGBABALIK
Oh, aking mahal na Ina
Pag-aalaga mo sa ’kin ay kakaiba
Para sa akin ika’y napakadakila
Maswerte ako at ikaw aking naging Ina
Mga Kaibigan ko’y may tinatawag na Ama
Pero masaya ako kahit ikaw lang aking kasama
Ginawa mo lahat sa abot ng iyong makakaya
Ginagampanan ang pagiging Ina’t Ama na mag-isa
Pagmamahal mo’y sapat na sa’kin
Kahit nahihirapan ka’y ‘di mo maamin
Kapag may problema’y nakangiti ka pa rin
Bawat tawa mo’y kay sarap damhin
Tumigil sa pag-aaral, ‘di na kayang tustusan
Sa gawaing bahay ika’y tinutulungan
Para hindi ka na mahihirapan
Hayaan mong kita’y pagsilbihan
Isang araw inanyayahan ng aking pinsan
Na sa ibang bansa kami’y mamasukan
Tumuloy ako kahit hindi mo pinapayagan
Sa mithiing ipaparanas sa ’yo ang kaginhawaan
Araw, linggo at taon ay lumipas
Lahat ng paghihirap aking dinaranas
Kinaya ko lahat para sa ating bukas
Paghihirap natin ay wala ng bakas
Masaya ka sa balitang ipinaabot
Sa mga dasal ay mayroon ng sagot
At mapapawi na ang lahat ng lungkot
Noong mawalay sa’yo, puso ko’y napuno ng takot
Uuwi ako taglay ko ang lahat
Sa aking pagbabalik, may ipon na sapat
Nang ako’y umalis ika’y umiiyak
Ngayon marahil ika’y magagalak
Ngunit tumigil mundo ko nang pinto ‘y binuksan
Ako’y napapikit sa nadatnan ko sa ating tahanan
Ating munting bahay ay puno ng kalungkutan
Mga kamag-anak ay naghihinagpis sa iyong pamamaalam
‘Di man lang kita nasisilayan bago ka lumisan
Ni sa tawag o sulat, walang kang ipinaalam
Mabuti pang ako na lang ang namatay
Dahil tagumpay na dala ay wala ng saysay
Maraming salamat po sa inyong walang sawang pagsuporta ng aking mga akda.