Wa koy lingaw maong pasagdi ko nga maghinumdum sa akong kaagi. Hahaha...
Kahibalo jud ko bisan katong bata pa ko nga naglisod jud me. Kanang akong mga uniform kay sinunod ug hinatag ra. Kanang sangga mi ni papa og sapatos. Sa buntag, akoy mosul-ob sa sapatos kay moeskwela. Ug sa gabii, siya napud ang mosul-ob sa sapatos kay motrabaho siya. Unya kung pangbuntag siya, aw magsinilas kos eskwelahan...molikay lang jud nga masakpan sa principal... Kanang akong bawn kay dos ra, panagsa ra pa jud. Kanang kumpleto kos requirements sa eskwelahan kay nag PO diay si mama. Kanang, akoy mo drawing sa project sa akong klasmyt kay para palitan pud kog bondpaper. Kanang ang akong klasmeyt kay photocopy or printed ang gipass, akoa kay sinuwat ra. Kanang pirme promisory note inig periodical test, kay para pa-take-on sa test. Maong kahibaw jud ko nga naglisod jud mi.
Paghuman sa hyskul. Didto na gyud nigawas akong pagkasuyaon. Suya kaayo kos akong mga classmate nga nagpa enrol nas college. Unya ako intawn, way chance nga mapaeskwela nilang mama ug papa. Ni try kog apply og working scholar, pero bisan pamplite para molokat sa mga requirements, wala mi.
So, ni trabaho ko sa public market sa mandaue. Stay in kos balay sa akong amo. Gipasaligan ko nga i-endorse ko ug pari para mogasto sa akong pag eskwela inig 2nd sem, pero wa man nahitabo. Ni undang kog trabaho sa merkado kay naka hearing ko nga ang among parish priest niadtong panahona, kay mo sponsor ug mga students nga gusto moeskwela.
So, niuli ko sa amo. Ni balik ko sa simbahan (sakristan diay ko sauna). Kay lagi gusto nako makuha ang scholarship sa among pari. Unsang pagka unsaa nga ang i-scholar diay sa among pari, kay iya diay himoong member sa grand choir. Bisag, bata pa ko ginasaway jud ni akong tingog, pero nagpractice jud ko ug ni audition. Uwaw kaayo pero akong gibuhat para lang jud makaeskwela, ug tuod man, wala jud ko nadawat. 😔
Maong nagtambay sa kos balay. Bantay bata sa anak sa akong ig-agaw. Tabang tabang ni mama sa iyang labada. Ug didto, nahibaw-an sa among karaang parish priest nga kamao ko maglabada... Maong niana siya nga ako nalang daw molaba sa iyang mga sinina human niyag duwa ug tennis, para daw lain nalang ang labadahan sa akong mama.
Hangtod nga iya kong gi-offeran nga paeskwelahon. Lipay kaayo ko! Tuod man iya kung gipatake ug mga entrance test sa mga eskwelahan. Pero didto ko sa ilang probinsya napunta kay nanginahanglan daw sila ug katabang didto sa balay. Nisugot ko basta kay maka eskwela lang jud ko, bahalag layo sa amoa ug wa koy kaliwat didto.
Didto akoy moluto, molaba, mamlantsa, molimpyo, mangguna, ug uban pangbuhat sa balay. Mumata kog alas 4 sa kaadlawon, para mabuhat ang tanang buhaton before mohayag kay moskwela man ko. Inig uli nako gikan eskwelahan, lain nasad nga buhatonon sa balay hangtod alas dose sa kaadlawon.
Nagpasalamat lang ko kay bisag di kaayo ko makatuon, maayo ra man akong grado. Pero, one semester ra ko didtong balaya kay di mi magkasinabot sa akong amo. Niuli ko sa amo.
Pag-uli nako sa amo, napugos akong maguwang nga paeskwelahon kog 2nd sem, tungod sa akong sigig panghangyo nila. Pero, wa na gyud ko masuportahi sa akong maguwang para sa akong 2nd year. Gipasud unta ko sa among PE Teacher sa dance club para mascholar ko, pero di man ko kamao mosayaw.
Maong ni stop kog 1 year nasad. Suya na kaayo kos akong mga klasmyt sa hyskul kay mag 4th year college na sila, ako 1st year pa gyud.
Nakatrabaho ko sa usa ka company, ug nakauyab. Hahaha... Makigminyo na bitaw na akong uyab... Pwerte nakong balibad... Hangtod nagbuwag. Na end akong contract sa company... Stambay nasad ug pila ka months... Kapuya oi. Suya na jud kos akong mga kaila ato nga hapit na mograduate.
Hangtod nakatrabaho kos jollibee. Nagka Utang utang para makalukat sa mga requirements. Gipasaligan nako akong maguwang ug ginikanan nga bayran dayon nako ilang nagasto sa requirements inig unang sweldo. Pero unang sweldo nako, niadto kos skwelahan ug akong gipa enrol akong sweldo.... Bahalag nakasuk-an ko kay niana ko nga akong bayran ang utang, pero ako diay gipa-enrol.
Didto nagsugod ang akong pagkaworking student. Klase kog 7am hangtod 4pm. Duty kog 5pm-12am. Mauli kog 2am, mumata nasad og 5am kay skwela napud. Kaloy-an sa Ginoo, performer jud ko sa akong trabaho ug skwela. Ma crew of the month sad intawn ug ma dean's lister pud sad bisag sa kalisod sa akong schedules. Usahay lang jud naa juy moments nga makahilak jud ko... Kapila ko hapit maligsan kay magpiyong molabang tungod kay walay saktong tug, kapila ko makasala sa jeep kay akong maigo kay nakatug ko. Usahay sad maglakaw kog layo layo padung sa amo kay kuwang nas plite unya samtang maglakaw ko moowan pa jud. Dramaha lagig feels.
Naa say mga instances nga kaundangon ko sa trabaho kay naka-away o wa nagkasinabtanay nako ang manager. Kaupat gud ko ni try ug resign... Pero thankful gihapon kay ila jud i turn down akong resignation.
Kanang naa pa jud problema sa balay. Kanang ang akong mga klasmeyt kay focus na kaayo sa ilang pagka-student, unya ako manginabuhi pa para naay ikabayad sa eskwelahan. Kanang matug kos eskwelahan kay duka jud kaayo kay wa koy saktong tulog, maghapin rag manila paper unya pukawon dayon ko kay padong na among maestro. Kapoya lagi. Pero, bisan pa man nakagraduate jud intawn.
Pag graduation, boot unta nako dad-on akong pamilya sa akong graduation kay lagi mopaso ko. Unya di pwede, kay way pamplete. Kanang naa kay mga klasmyt nga murag usa ka barangay ni attend sa ilang graduation, unya mangaon pa daw silag restaurant kay celebration, unya ako nag inusara ra. Makasuya oi. Way mo picture nako kay wa koy camera, wa say mo picture. Hala, nagtaxi pa jud sila. Ako, intawn wa jud, as if ordinary ra kaayo to nga adlaw.
Bisag hangtod atong mga panahona, grabe gihapon ang kalisod sa kwarta. Asa kog kwarta para sa graduation picture? para sa ringhop? para toga? ug para sa uban pa?... Lisoda. So, trabaho jud ug taman... Lunes hangtod dominggo. Pero, mapasalamaton gihapon ko kay bisan pa man sa tanan nga kalisod nga akong naagian, naa gihapon ko nakiggubat sa hagit sa akong kinabuhi.
Nahuman nako akong kurso, kay lagi kursonado. After few days gikan sa akong resignation sa jollibee, nakatrabaho dayon ko as instructor sa usa ka training center samtang nagtudlo pud ko isip usa ka ESL Teacher. Ug dako kaayong gasa nga unang take nakapasar ko sa LET. Ug pagka sunod tuig, nadawat nadayon ko sa DepEd.
Lipay kaayo ko nga nakaabot ko ani....tungod jud nis akong kasuyaon. So salamat sa akong mga kaila nga masuya jud ko sa una.... Suya siya tan-awon pero kung imo jud sabton na-inspire ug na motivate ra jud ko.
Karon, bisag lisod gihapon at least dili na sama sa una. Kuntento na gani ko nga in-ani. Naay klaro nga trabaho, naa pa jud time nga maka-serve sa simbahan, makalaag laag nasad, makatan-aw nag sine, makasulod nag restaurant kay pagka-ignorante naman lang jud nako. Hahaha
Di ko brayt, pero naning ko.
Di ko dato, pero nakahuman ko.
Di ko swerte, pero blessed ko.
Di ni ako, kung wala Siya.
