Takoh kaye glee, peugot go baci.
Tasalip bili, cop oen meuria.
Katroh lom teuka, keuno lon ili.
Jak saweu famili, bak donya maya.
Haba peu ingat, lon ulang kaji.
Kon haba keuji, ulon calitra.
Nibak jameun nyo, macam taeu hi.
Macam teurjadi, ka dikeu mata.
Beungoh ngon supot, nyata meudali.
Maksit keu rabbi, meuraja lela.
Inong ngon agam, taeu saban kri.
Bak bineh pasi, ka ji meu wawa.
Dosa bak allah, han ji peudoli.
Larangan rabbi, keunan ji teuka.
Asai ka malam, ka peugot janji.
Wate lheuh jibi, hate that suka.
Padup trep lawet, badan ka seu'i.
Hawa boh punti, ngon boh meuria.
Na padup beuleun, nyata ka meuri.
Susah si nyakni, ka badan dua.
Oh ban ka lahee, si aneuk bayi.
Cukop that tari, ceudah that rupa.
Hate that susah, poma ngon abi.
Male ngon wali, dan wareh lingka.
Kon haba peuna, ulon jak rawi.
Memang terjadi, di aceh mulia.
Kasep yang kana, geubi tsunami.
Bekle trok keulai, lage yang kana.
Leupah na lagak, kuala idi.
Jalo meuriti, bak ming kuala.
Ohno meumada, haba lam rawi.
Singoh hai wali, ta sambong teuma.
