Halo sedulur kabeh, priwe kabare ? Moga – moga padha waras bedhigas donya akherat Amin....Ketemu maning nang “ Ngapak Corner “, Edisi kali ini inyong arep ngulas babagan kesenian khas Banyumasan.
Seni lan budaya khas Banyumasan tuwuh lan umure padha karo peradaban Jawa Kuna.Beberapa ana sing entuk pengaruh budaya sekang Mataraman.
Kie beberapa contone Kesenian khas Banyumasan
1. EBEG
Foto : Pemain Ebeg | Source
Sapa wonge sing ra ngerti Ebeg / Ebleg. Ebeg kue kesenian tari tradisional sing paling terkenal nang dhaerah Banyumasan. Tarian kie nganggo “ Ebeg : yaiku anyaman sekang pring sing bentuke kaya jaran diwernani ireng utawa putih diwenehi kerincingan. Penarine nganggo rangkepan kathok batik, kacamata ireng, makhutha, sumping.Tangan karo sikile uga diwenehi kerincingan. Tarian kie diiringi karo gendhing gamelan. Peralatan kanggo pengiring Gendhing sing digunakaken yaiku kendang, saron, kenong, gong lan trompèt. Saliyane peralatan gamelan karo tarian, ana uga ubarampe ( sesajen ) sing kudu ana yaiku kembang, gedhang raja karo gedhang mas, degan lan jajanan pasar. Unike sekang tarian Ebeg kie yaiku pas wayahe pemaine mendem ( kesurupan ) biasane mangani beling, ngonceti degan ngambi untu, karo mangan bamba. Lha kie sing paling dienteni sekang Ebeg kie.
2. LENGGER CALUNG
Foto : Para Penari Lengger | Source
Jenenge be Lengger Calung, tarian kie isine Lengger ( penari ) karo Calung ( gamelan sekanng pring ). Penarine obahe dinamis lan lincah ngetutna suara gendhing Calunge. Jumlah Lenggere biasane 2 ngasi 4 wong. Klompok calung mbutuhna paling ora 7 anggota sing kalebu pemain gamelan lan penari / lengger karo sinden.
3. WAYANG KULIT BANYUMASAN
Kaya wong Jawa umume, wong Banyumasan uga seneng nonton pertunjukan wayang. Wayang nang Banyumas diarani gaya Grag, mangkane diarani Wayang Gagrag Banyumasan. Seni Wayang Gagrag Banyumasan kie jan – jane ya padha bae karo wayang kulit Jawa liyane. Mung bedane nang basa sing dinggo karo ana karakter wayang sing beda yaiku nek nang wayang kulit liyane Bagong nang Banyumasan diarani Bawor.
Tokoh Bawor Ikon Wayang Kulit Banyumasan
4. GENDHING BANYUMASAN
Gendhing khas lagu Banyumasan yaiku dadi pewarnaan maneka warna seni tradisi Banyumasan, malah dadi ciri khase. Utamane karo macem-macem kreasi anyar sing bisa nampilna irama Banyumasan lan dialek Banyumasan. Ciri khas liyane Gendhing Banyumasan ana parikan yaiku pantun sing isine sindiran, irama luwih dinamis tinimbang irama Yogya-Solo malah luwih mirip karo irama Sunda. Syair - syaire umume ngemot pitutur, humor, nggambaraken wilayah Banyumas lan ngandhung kritik sosial masyarakat. Lagu Banyumasan bisa diputer karo gamelan biasa utawa gamelan calung. Kaya irama gendhing Jawa umume, irama gending Banyumasan uga ngenali laras slendro lan pelog.
5. MUSIK KENTHONGAN BANYUMASAN
Foto : Musik Kenthomgan Banyumasan | Source
Musik kenthongan nang Banyumas wis lair lan dikembangna dadi musik sing dadi atraktif lan bergairah. Saben grup bisa nampilake kreatifitas kanthi bebas, tanpa aturan baku. Kebebasan kreatifitas dadi salah siji atraksi musik iki. Saben klompok bisa ndadekakna gampang utawa rumit tèknik musik miturut kemampuan lan kepinginan. Musik Kenthongan musik nang Banyumas sebenere wis ana awal taun 1970-an. Nang Kecamatan Cilongok, Kabupaten Banyumas ( kurang luwih 10 km arah kulon Kota Purwokerto) ana sekelompok wong sing ngembangake kenthongan dadi perangkat alat musik. Carane nggawe alat kenthongan jumlahe akeh terus ditabuh bareng – bareng. banjur ngalahake. Ing wektu kuwe ana wong nyoba nglebokaken instrumen musik sing nyrupai angklung sing cara nabuhe ditutuk. Banjur dadi aransemen musik Kenthongan.
Nah kue beberapa kesenian khas Banyumasan. Wajib dilestarikan kue ya lurr !!! Aja ngasi kalah karo kesenian sekang luar negeri.
#banyumasan #ngapak #seni #pesonaindonesia
Pamungkas de L@ste
@pamungkas-laste
Posted from my blog with SteemPress : https://pamungkas-delaste.000webhostapp.com/2018/07/ngapak-corner-2-kesenian-khas-banyumasan