Nabi Ibrahim Mengenal Tuhannya | 20180904 Pantun 002 ( Poetry ) #81

alt

Assalamualaikum saleum ulon bri
Ban lagei janji peu gisa haba
Pantoen calitra seujarah Nabi
Kisah beu meu kri ulon peu nyata

Ka dua blah thon umu di Nabi
Goh na geu turi Tuhan po donya
Donya ban sigom raya leupah hi
Pat keuh raseuki Tuhan meujumpa

Geu tinggai guha ngon niet yang suci
Geu beudoeh Nabi u nanggroe mula
Uroe ngon malam doa bak Rabbi
Geusoetoet panji Tuhan yang esa

Oh watei malam bak piyoh Nabi
Pandangan gubri u langet donya
Geu kalon bintang indah han sa kri
Hate memuji, Tuhan geu peuna

alt

Geu peugah bintang, nyan Tuhan Nabi
Yoh goh meuturi ngon Dzat yang esa
Ban teuka beungoh ka laen lom hi
Ka gadeoh janji, indah tan le na

Meunyoe bintang nyan meunan sabe hi
Teuntei kon Rabbi Maha Kuasa
Geulombang rasa susah di Nabi
Saweub Ilahi goh na meujumpa

Keu mata uroe tunyok keu Rabbi
Saweub raya hi, ngon trang leupah na
Di watei malam sopot han sakri
Keucewa Nabi oh yang keu dua

Cokop that bimbang hate di Nabi
Doa ngon janji bak Tuhan geu ba
Maksud di hate Tuhan geuturi
Seujahtra neubi le yang Kuasa

Gaseh bak Allah doa di Nabi
Cahya ka geubri, hate geu buka
Meunan geu surah lam kitab suci
Lam saboh rawi untuk Ambiya

Meu leupah seunang hate di Nabi
Syukur ke Rabbi putoh tan le na
Nyoe katroh masa Tuhan geuturi
Meututo Nabi ngon Yang Kuasa

Tuhan yang adee geu peu troh janji
Peu teutap hate Nabi mulia
Ngon peut neuk ticem Tuhan peu saksi
Keu pada Nabi ngon sigom donya

Ticem yang hudep geu koh meubagi
Putoeh hanco hi, mate binasa
Khendak bak Tuhan, Kudrah Illahi
Meuriwang keumbali hudep seumula

Teuma oh lheuh nyan teunang di Nabi
Keu Tuhan suci, geu peu teutap ka
Allah Taala ka teuntei Rabbi
Yang Maha Suci, lagi Pencipta

alt

alt

Posted from my blog with SteemPress : https://pupu93.000webhostapp.com/2018/09/nabi-ibrahim-mengenal-tuhannya-20180904-pantun-002-poetry-81