Salam alaikom ulon bri sapa
Seunambong haba beuklam ceurita
Dalam hikayat ulon meu haba
Mangat neubaca le gata dumna
Saja lon tuleh sinoe kosong sa
Seubab na dua dan seterusnya
Lon lakee meuah yang han jeut baca
Neu vote le gata nyan ka meumada
Steemit di aceh jinoe ka jaya
Rame anggota yang na lam maya
Mudah - mudahan sehat seujahtra
Hudep bahgia sabe tiep masa
Umu lon tuan ka lhee ploeh dua
Si bijeh mata si pasang kana
Agam nan rayyan yang inoeng izza
Dua thoen beda aneuk lon dua
Tinggai lon tuan rap deungoen kota
Kutablang nama dilee koen kana
Kayem lon singgah di kampong jawa
Rame syedara sinan meubanja
Teuma keurija dumpue lon raba
Asai bek riba judi ngon ganja
Dari meu tukang meu ikat bata
Setel parabola nyan cit ka biasa
Meunyoe buet teutap han pat tamita
Peng han meumada kureung beulanja
Puelom geutanyoe na keluarga
Breuh eungkot beuna di ateuh meja
Hoby di ulon bak olah raga
Volly ngon bola si goe - goe beuna
Peu sehat badan tamah teunaga
Bek dikheun rakan " Leumoh Aneuk Muda "