"Assalamualaikom wareh lon sayang
Saleum lon layang keugata dumna
Neubaca beuabeh ca'e lon karang
Teuntang seumayang nasehat ulon ba
Saban katateupu adun ngen adoe
Wajeb keugeutanyoe seumayang beuna
Lam tiep tiep malam lam tiep tiep uroe
Seulama geutanyoe akai manteng na
Cuma kadang uleh geutanyoe
Seureng keubeuoe bak takeurija
Alasan cit na meumacam bagoe
Karna geutanyoe syetan ji goda
Tapi geutanyoe wahe e rakan
Beuteuga iman ilme lam dada
Tameukreuh tu'ot syetan talawan
Karna syetan nyan musoh yang nyata
Jaga seumayang bek sampe tinggai
Karna nyan beukai oh mate teuma
Hudep lam donya siat tok sagai
Untuk meuamai keunanggroe baqa
Tujuan lon peugah haba lon narit
Keurakan steemit peuingat ulon ba
Bek ngen gara gara ata nyo takumit
Tinggai but wajeb yang geuyu keugata
Lon peukhusus seumayang haba lon ireng
Karna nyan yang seureng takalon rupa
Beucaroeng tanyoe beuna tabandeng
Teh leubeh peunteng geutanyoe keurija
Nyokeuh sagai yang ingin lon peugah
Lon lake meuah pat salah kata
Pat na yang salah jeut tuwan peugah
Mangat meuguna keutanyo dumna."
Gamba screenshot bak google