Bak saboh uroe Lem Plok jipeudieng le cewek. Nyan keuh uroe paleng meuseujarah lam udep Lem Plok sampoe 'an uroe nyoe, 29 thon jih udep ateuh rhueng bumoe.
Seujarah Lem Plok bak urosan meucewek cit kureung that-that. Adak pih na rupa meu India-Arab siangen, teuma nyan sagai tan dipakek le Lem Plok keu modal cakoe-cakoe cewek. Padahai lagee si Surenbakai peugah, "Meunyo lagee kah hi, hai Lem Plok meutuwah. Peu meu si Tari nyang tem. Meu Cut Tari pih teu seuh'ee-seuh'ee dikalon kah. Peu lom Luna Maya. Ukoran, ubena Ariel teupileuek ih miseue katajoe kah."
Meutapi nyan keuh meunan. Kiban pih si Surenbakai ji bri seumangat keu Lem Plok, ngon jih siurat teuk nyan, ijih teutap lagee na droe ih aju. Cewek hana euntak ngon tuha, sampoe rap lhee ploh umu. Bek le tapeugah dimeucewek, meu ngon inong tan. Meunyo meunurot Surenbakai, "Susah ngon kah kon peu laen. Kah ka meucewek tan, ka meungon ngon inong pih han. Lheuh nyan, galak keu agam pih hana cit. Adak jeut ka meuhat laju. Ka hana ka meucewek, ka meucowok aju keudeh. Kon peu laen, watee ta calitra kisah kawom Nabi Luth bak aneuk miet beuet di meunasah langsong jeut ta tunyok kah."
Peu nyang dikheuen atawa dipeu ulok le si Surenbakai, seubeutoi jih na meunyum cit lam pikeran Lem Plok. Teuma nyang jeut keu masalah bak jih meunyo urosan peutoe ngon cewek kon peu laen, seulaen masalah meu khot-khot lam saboh tuboh. Pokok jih asai ka toe ngon aneuk dara, Lem Plok langsong teumugu, lagee rumoh panggong lam geumpa. Nyan kakira keudroe aju, meunyo ka teumugu lagee nyan, bajee abeh buluet ngon ru-oeh. Sampeo bak saboh uroe, aleh kiban cara Lem Plok jibaplueng u rumoh saket le sidroe aneuk dara.
Lheuh keujadian nyan, lheuh woe dari rumoh saket, Lem Plok payah kurong droe irumoh meu uroe-uroe. Le ureueng tanyong peu seubab ijih jibaplueng u rumoh saket le sidroe cewek hana dipakoe le Lem Plok meubacut pih. Teuma meuseubab Surenbakai na keuh ngon jih siurat teuk, nyan keuh bak si Surenbakai nyang na dipeugah hai keujadian nyan.
"Boh peu laen. Lem Plok saket cit ngon cewek. Laen adak meu nyamok malaria diramien jih meu uroe-uroe, jih meu sapeue pih tan. Teutap sihat jih. Teuma bak uroe nyan, na aneuk dara rupajih nyang dimeukaoy; kiban pih cara ijih beu dimeukawen ngon Lem Plok. Dan dipeugah teuk hai nyan langsong bak Lem Plok keudroe. Jadi nyan keuh meunan. Lem Plok langsong pansan bak meunet nyan," peugah Surenbakai bak uroe laen keu mandum aneuk muda di keudee kupi siblah.