"هو الجواز حلو؟" بين الواقع والحلم

"هو الجواز حلو؟" بين الواقع والحلم

"هو الجواز حلو؟"… سؤال بنسمعه كتير، بس الإجابة مش دايمًا بسيطة.

الجواز مش مجرد فستان أبيض وفرح، ولا صور حلوة على السوشيال ميديا. الجواز حياة كاملة… فيها ضحك وزعل، تفاهم وخلاف، أمان وتعب.

أنا مش هكتب هنا كشخص بيحكم على الجواز من بعيد، لأ، أنا

هكتب كحد شاف، وسمع، وعايش.
الجواز في حقيقته مش نهاية المشوار، بالعكس، ده بداية جديدة خالص. بداية فيها شريك بيشاركك كل حاجة… من تفاصيلك الصغيرة، لحد أحلامك الكبيرة، وحتى لحظات ضعفك اللي بتخبيها عن الكل وكمان متنساش العيله .

في أول الطريق، كل حاجة بتبقى جديدة، ساعات حلوة وساعات صعبة. بتحاولي تفهمي الشخص اللي قدامك، وهو كمان بيحاول. ساعات بتعدي لحظات تقوليلك:
"هو أنا ليه اتجوزت؟"
بس بعدها بتيجي لحظة واحدة تخليكي تقولي:
"الحمد لله إنه جنبي."

الجواز محتاج تفاهم، محتاج حوار، محتاج نية حلوة وقلب صافي. محتاج إننا نفتكر دايمًا إننا مش بنعيش مع ملاك، ولا نسخة مننا، لكن إنسان… بيفكر بطريقة تانية، وبيغلط، وبيتعب، زينا بالظبط.
الجواز محتاج مجهود مستمر .

دلوقتي بعد ما بقيت أم، فهمت أكتر قد إيه الشراكة دي محتاجة مجهود، وازاي إن الدعم النفسي اللي بين الاتنين بيخلّي الحياة أخف، حتى لو كانت مش سهلة.
وفي وسط كل التعب، فيه ونس… فيه دفء… فيه حد بيطبطب عليكي من غير كلام.

الجواز مش حلو؟ لأ، هو حلو… بس لما نكون مستعدين ليه بوعي، وبنية، وبقلب يعرف يحب ويتحمل ويعدي ويلتمس العذر.

سؤالي ليكوا:
إيه أكتر حاجة تعلمتوها من الجواز؟ أو لو لسه ما اتجوزتوش، بتفكروا فيه إزاي؟
#خواطر #زواج #تجارب_شخصيه