Bala di aceh jino loen samboeng
Mula-mula phoen uloen calitra
Gunong seulawah manyang meulamboeng
Pucoek geureudoeng meu top lam hawa
Sidup nan bala tuhan neu peutren
Patah bak aroen meu banja-banja
Dum moto mewah honda ngen seutoem
Mandum jiguloeng uleh ie raya
Bala di aceh jino loen samboeng
Mula-mula phoen uloen calitra
Di peukan aceh keudee peunayoeng
Ureng meuron-roen jijak beulanja
Ladoem bloe kupie ladoem bloe tupoeng
Puwoe u gampoeng peu ek bak honda
Uroe pih tarek payah meupayoeng
Ureung tan meuphoem karab na bala
Lapan limeng blah geumpa meugeudhuem
Ureng dum jiplueng teubiet u luwa
Ladom bineh ie keunan ji aroeng
Lage boh roem-roem agam ngen dara
Hana jiteupue donya geu guloeng
Allah e poloen dahsyat lageina
Benteng TPI patah dum ruhueng
Sinan dum ureung nyang leu binasa
Tiang meugok-gok tameh dum keng-keung
Sinan dum ureung meuputa-puta
Sang-sang kiamat watee tapeu nyum
Bala tuhan lom keu ummat dum na
Diureng kaya rumoeh meugeudoeng
Deungen ija kroeng geu plueng uluwa
Hana teu ingat aneuk lam ayoen
Peu siblah untoeng takoet kegempa
Eetno dilee dari uloen tuwan ....