Pag-ampo
Ikaw duolon ko dinha sa pag-ampo
Ako moluhod, makig-istorya kanimo
Tungod kay ikaw, akong Ginoo.
Kanimo, nanginahanglan ako.
Daygon ko ang imong ngalan,
Ang Hari, sa tanang kalibutan.
Ang nagbuhat sa kinatibuk-an
Ang sangpiton sa tanan.
Dili usab nako hikalimtan.
Alang kanako, ikaw nasamdan
Tungod sa akong kalapasan
Karon nangayo og kapasayloan.
Ug sa kanunay, sangpiton ko ikaw
Tungod sa grasya sa matag-adlaw
Sa panginahanglan aron mabuhi
Kay ikaw ang tinood nga kinabuhi.
Diha sa imong ngalan, ang tanan itugyan
Akong kinabuhi, akong panginahanglan.
Kay kung wala ka, wala akoy mahimo
Ikaw ang dalangpanan, akong Ginoo.
Mensahe:
Hinaot dinha sa matag-usa kanato, dili kita makalimot sa pagsangpit sa Ginoo. Kini usa ka buhat nga makahatag kanatog maayong relasyon tali sa Ginoo. Ug dinha sa atong pag-ampo ug pagsangpit Kaniya, dili nato hikalimtan nga kita angay gayod nga magdayeg sa iyang Ngalan, mangayo og pasaylo ug pasalamat tungod sa mga grasya nga iyang gibubo kanato ug ato usab itugyan kaniya ang atong kinabuhi.
