Kial mi nomas min LaPingvino? 🤔

Saluton! 👋

Mi nomiĝas Joop Kiefte, nun dum pli ol 12 jaroj parolas Esperanton, kaj mia kromnomo ekde sufiĉe baldaŭ post komenci paroli Esperanton estas LaPingvino. Sed kial?

Mi ricevas ĉi tiun demandon sufiĉe ofte, kaj ŝajnas al mi saĝe nun publike respondi ĝin por ke mi povu redirekti homojn al la respondo kiam venas demandoj.

Mi jam dum multaj jaroj uzas Linukson kaj ege ŝatas Linukson. Kiel kelkaj eble jam scias, Linukso havas maskoton. Ĝi nomiĝas Tukso (Tux). Jen ĝi kun kelkaj Esperantaj simboloj:

Kiam mi eklernis Esperanton, mi ankoraŭ ne havis fiksan kromnomon. Mi ofte uzis miajn unuajn literojn, sed mi sentis la bezonon ekuzi veran kromnomon. Por lernu.net mi elektis la nomon Pinguin (Pingveno) kaj tiu ĝis nun estas mia konto tie.

Poste en alia retejo, mi ne plu memoras kiu ekzakte, mi faris konton kaj decidis ke la nomo estu kaj en Esperanto, kaj nepre unika, do mi entajpis la literojn LaPingvino en la kampo. Sen spaco, kun artikolo, kaj ofte kun la majuskloj ĝuste tiel krom se ne eblas alie.

Poste mi rimarkis ke pingvino estas skriberaro, sed mi decidis resti kun la eraro, ĉar ĝi povas memorigi min pri mia iama komencanteco. Kaj eĉ pli poste, kiam pro mia kromnomo iu misskribis la vorton pingveno en instrumaterialoj, mi decidis kontroli kaj menciiĝas pingvino kiel arĥaika formo de pingveno. Do eĉ ne estas tute erara. Mi jam fariĝis arĥaikulo! 😄

Dankon pro via legado ĝis ĉi tie, kaj se vi ŝatas ĉi tiun artikolon, aliĝu al ĉi tiu retejo kaj voĉdonu. Cetere legu en aliaj artikoloj ekzemple de Hive account@vanege kaj plu en #esperanto kiel vi mem povas partopreni kaj eble estontece iam gajni eĉ monon. Ankaŭ legu #novajhoj kaj bonvolu mem kontribui tie!