Linus沒有說話，只是拿出了另一支鑰匙，把門鎖打開。Linus打門推開，「支」......在死寂的走廊中，門鉸所發出的聲音顯得特別刺耳......
「啪」的一聲，電燈亮了。淡淡的螢光照得眾人面色發白。
「呢d雪櫃就係用黎放屍體㗎？」
「入面有幾多條屍呀？」
「張手術枱係唔係用黎做解剖用？」
一班新鮮人對這間停屍間感到十分好奇，七嘴八舌的問過不停。一般人對這個地方都是避之則吉，但對這班醫科生來說，卻像小孩子去了一個新的遊樂場一樣，四圍摸索，所有東西都拿起把玩一番。
「台灣仔，叫你個組仔唔好開個雪櫃，入面唔知有冇料㗎。」Linus 突然開口。正在嘗試打開其中一格雪櫃的藍衣青年聞言亦只好停下來，尷尬的望向今年迎新營的主席。
Linus把手中那一串鑰匙交到芝麻手中，冷冷的說：「我約咗人，要走先。鎖匙交俾你。你個組今日成績最好，大懲罰幾時完由你決定。Bye!」說罷頭也不回的走向剛才的門口。
芝麻口中唸唸有詞，但是無人聽到他在說些什麼。
博士側着頭：「聽唔到，可唔可以大聲啲!」
芝麻再說：「Linus緊係約咗熊爺啦，慌唔係又玩講鬼故咩？想人地驚到攬住佢成晚呀嘛！」
所有白衫青年異口同聲道：「咸濕仔！」
站在芝麻旁邊紅衫新鮮人一臉迷茫的說：「洪爺？！ 唔通主席係基嘅？」
「唔係洪爺，係熊爺，熊人個熊！冇人知佢點解改個咁嘅名，不過就係人都知佢係Medic 第一美人！同Kristy, Nicole, Susan 合稱大學四大美人。勢估唔到我地hall嘅人居然date哂佢地四個......」沉默了十多分鐘的Kitkat借機會連珠爆發。「但係點解我咁靚仔都冇份！公平咩？！！！」
「收聲啦！」Aaron又再次阻止Kitkat。『台灣仔，係時候介紹一下我地嘅大懲罰啦！」
「無錯，正經事要緊！快d攪掂呢度就去搵Lydia!」台灣仔似乎並沒有忘記他的“正經事”。
「好，而且就講一講今晚嘅大懲罰到底係咩一回事！ 首先問下大家，有冇人知道呢度係咩到方？」
一名橙色新鮮人舉起左手，不住揮動，很興奮的說：「我知！我知！」
台灣仔指着他說：「阿邊個，你答！」
「係我地Medi嘅停屍間！ 」
「全中！呢度就係黎緊幾年你地會係度花費大量時間嘅停屍間！ 問題再黎， 有冇人知道點解呢度樓底咁高，成廿幾三十呎！每年要清潔天花都要花費大量人力物力...」
另外一個橙衣新鮮人搶着說：「傳說話呢度原本係一個大禮堂的一部分。二次大戰時，日本軍徵用咗我地個hall做作戰總部，而呢個大樓入面嘅大禮堂就用黎做停屍間。傳聞話當時嘅屍體疊到上天花板呀！ 大戰結束之後，呢座大樓被改建成為醫學院其中一座教學樓。而個大禮堂亦都被分開幾個部分。其中呢個房就係陰氣最重嘅一間，所以就拎黎做咗學生解剖用嘅停屍間喇！」
「冇錯！不愧係博士個組嘅組仔，關於醫科嘅知識冇野可以難到你地...」同樣身穿橙衣衫的博士臉上難掩得意之色，但言猶在耳，台灣仔又說：「可惜係冇咩常識同智慧，如果唔係就唔會答熊貓係紅色。哈哈哈哈...就係輸咗呢件俾芝麻個組...哈哈哈哈...」
博士的面真的變成了紅色，叫道：「繼續埋去啦，又話約咗台妹！」
「係喎。講返今晚嘅大懲罰先。咪住，阿Ken sir, 唔係，你仲未教書嘅，阿Ken, 你想去邊。人黎，同我捉佢返黎！」
原來建宗想乘大伙兒不為意之際偷走。可惜還未走到門口就被捉了回來。
「阿Ken, 你聽清楚啦，今晚嘅大懲罰就係.........你一個人今晚喺呢個停屍間過一晚。」聽到這裏，建宗的臉色已經變成慘白。
「放心，雖然臨近七月十四，但仲未係正日，唔使怕嘅。原本諗住留少少零食俾你嘅，不過唔記得帶。冇喇。其實諗深一層，你有零食，唔覺意引埋個d野黎一齊開心share咪仲死。所以冇帶零食對你黎講反而係好事呀。」健忘又多口的Kitkat盡量想合理化自己嘅過失。
「好喇，夠鐘啦。解開阿Ken。我地走喇。」台灣仔心急的道。
就在兩名藍衣的新鮮人解開了綁着建宗雙手的繩索之後，建宗用力的掙脫另外兩個按着他的肩膀的新鮮人的手，一支箭似的衝向房門。但是不幸地，和正在離開的博士撞個滿懷，兩人雙雙跌在地上。說時遲那時快，六道三色人影用接近人類極限的速度把建宗撲倒，再將建宗牢牢的壓在地上。
「放開我！放開我！我唔係阿Ken呀！ 我路過被你地捉咗黎玩遊戲㗎，唔關我事㗎。我唔係呢度學生黎㗎。」
「到咗而家呢一刻先講呢啲野？太遲啦。今晚一定要人接受大懲罰嘅！」芝麻一反常地大聲說道。「更何況你而家先講埋哂呢啲說話，你估下仲有冇人會信呢？你都係乖乖地係度過埋今晚，都係幾個鐘啫！」
芝麻說罷把頭一轉，目光朝其他人掃了一圈，繼續說：「我地走！」
一眾白衣的迎新營組長跟著芝麻走出房間，停在門外向房中看過去。而三色新鮮人亦小心的慢慢放開建宗，在建宗站起來的時間，已經全部快步跑到門外。Kitkat隨即將門關上，芝麻沒有浪費任何時間，立即把門從外鎖好。
就在門剛剛被鎖上之際，「彭」，門後傳來一聲巨響。「彭，彭，彭，彭，彭......」門後不停傳來大力拍門聲，隱約還聽到建宗的叫聲「放我出黎呀！...」
所有人都朝着房門呆呆地望着。突然間，台灣仔朝着他們進入這大樓的側門跑過去「我夠鐘啦，走先啦...Lydia Lydia...」
其他人彷彿被台灣仔的舉動叫醒了一樣，都向着同一方向走去。
「師兄，我聽閒話除咗你地之前講嘅大學四大美人之外，仲有一個靚女叫咩"劉美女"嘅。好似話仲靚過四大美人喎。」話題一開，所有人都圍着Kitkat,大概所有人都知道那一位最大機會開口。
果然不出所料，Kitkat邊行邊說：「嗱，我都係聽返黎，從未見過呢個傳說之中嘅"劉美女", 好似話......文學......」
隨著眾人漸漸遠離大樓，四周亦回復寂靜。就連停屍間大門亦沒有再傳出任何聲音。
第二回 - 完
圖片來源:1, Pixabay.
