Vor mehr åls zwoahundertdreißg Joahr,
wia s’ I’viertl nu boarisch woar,
woar auf dem höchstn Punkt vo ’Zell
a wichtige Zoll- und Handelsstell’.
Zwischn Zell und Redleitn war die Landesgrenz,
dö’s iatzt nur mehr ois Bezirksgrenz kennt’s.
S’ Königreich Bayern woar då herent
und d’ Gråfschåft Frankaburg då ent.
Da Handel mit Sålz håt machti g’blüaht,
vom Inn her ham s’ ös auffa g’führt
Dö Landerischn ham für’s Sålz
an liabern zåhlt mit Troad und Hoiz.
Landwehrleut , so Grenzsoidåtn
woarn ständig a da Schrann herobn.
Ob mit Roß, Wågn oder auf’n Füaßn,
wer umi wollt’, håt Maut zåhln müaßn.
Bei’n Tåg håt’s g’hoaßn: Maut verlanga,
ba da Nacht dagegn hams Schmuggla g’fanga
Schwärzer ham’s dö Schmuggla g’nennt
wegn dem Ruaß im Gsicht, dass koana kennt.
Da Kurfürst Max am Boarnthron
håt koan Erbn g’håbt, koan Sohn;
wiara siebzehnsibmaziebzg is gstorbn
is a Erbfolgekriag ferti worn.
Siebzehnhundertneunasiebzg im Mai
war der Erdäpfelkriag vorbei,
weil da Friedn vo Teschen håt bestimmt,
daß’s I’viertl zu Österreich kimmt.
Wia d’ Maria Theresia dann is g’storm,
ham’s wieda af ins gspitzt, dö Boarn.
Scho ham’s neuli s’ Messa g’wetzt
und sogoar d’ Franzosn af ins g’hetzt.
Da Napoleon vo Frankreich drent
håt ins a poar Moi überrennt
und seinö oidn Freund, dö Boarn
han bei ins wieda gschafti worn.
Nåch achtzehnhundertzehn
is a der Spuk dann umi gwen.
Dö neue Währung woar da Gulden,
ham åba eh nix g’håbt, wia Schulden.
Dö Grenzstation woar weg, vor ålln
hand dö Gebäude schnell verfålln.
Dö wås z’erscht han ois Schmuggla g’ganga
ham s’ Wildern oder s’ Raubm ang’fanga.
Da Räuberhauptmann Osterkorn
is in der Zeit berüchtigt worn.
Mit guat zwoanzg wuide Räubersgsoilln
håt er Bau(er)n und Fuhrleut überfålln.
Achtzehnhundertsechzg hams’n dann g’fanga:
lebmslängli is er a’s Häfn ganga.
Es is’s ruahli wordn dann
då herobman an da Schrann.
An dem Plåtz ermahnt ins heit
nur mehr dös Taferl an dö Zeit,
wia s’ I’viertl nu boarisch woar
vor guating zwoahundertdreißg Joahr.