Assalamualaikum rakan-rakan steemit ban sigom donya. Kiban haba sagoe nyan? Tameudo'a beu sabe-sabe dalam lindongan Allah Ta'ala. Amiin.
Manteng uroe raya sagoe nyan? Dikamoe miseu golom habeh buleun Syawal nyan sabe-sabe uroe raya. Meunyo meunan beurati uroenyo rhet uroe raya keu 8. Bei-bei uroe raya manteng na bacut sapat teuk. Hai na tinggai kueh bacut sapeu, na sirop cap patong meu sikhan kaca, di aneuk miet manteng ditijik bude ban sipanyang jalan. Nyanban.
Alhamdulillah thon nyoe manteng geubi umu panyang le Allah untuk ta rasa uroe raya. Uroe raya thon nyoe cukop meurasa. Meurasa meukumpoi ngon bandum keluarga, meurasa ta sambong silaturrahmi, meurasa ta pajoh makanan, dan meurasa hek. Hai kiban han hek reh di gata, mulai dari padup-padup uroe keuneuk uroe raya nyan hana meutume peuleuh ungkap le. Peugleh rumoh, sampoih rambideun, jak bloe baje baro, peugot kueh, peuget lontong, peugot timphan, jak peugleh kuburan, macam dum. Nyanban seumarak bak tasambot uroe kemengan keu geutanyoe ureung Islam.
Puncak hana meutume peuleuh ungkap nyankeuh supot uroe raya. Mak ka geuramah tupong timphan, ija top jeundela baro teungoh dipasang, lontong ka ateuh dapu. Di kueh bawang manteng hana meupat tupong. Allahurabbi. Teuma dikamoe na meu dua-lhee di rumoh, alhamdulillah pubuet bacut sapo akhebuet bagah leuh cit. Leuh bandum buet ka malam. Ka tajak jok fitrah keu Tungku, leuh nyan teukeubi siat. Kajeut jak eh ngat awai beudoh eh singoh beungoh.
Beungoh uroe raya phon ka talangkah u meunasah atawa u mesjid untuk ta sembahyang uroe raya, woe dari mesjid langsong jak bak kuburan. Ta meudo'a bacut sapeu keu ureung lam kubu nyang ka awai geuhei le Po teuh Allah.
Seulama ureung jak u mesjid, ureung inong nyang na sinyak bilah, nyang teungeh halangan ka tinggai di rumoh. Ureung nyang tinggai di rumoh wajeb peubereh peu nyang golom bereh, peulaku peu nyang perle peulaku, pokojih woe ureung di mesjid khanduri beu ka na ateuh meja, lontong beu ka siap pajoh. Nyan ban aju tapeugah.
Meunan leuh seumajoh peu nyang na jak u dapu jak rah pingan teuma. Rah pingan lage khanduri, meuhambo meusipreuk. Leuh nyan tapakek baje baro. Ta sambot jamee nyang jak silaturrahmi u rumoh. Ta jak bak ureung lingka tajak meu'ah desya lahe ngon baten. Nyankeuh meunan uroe raya phon ulon tuan. Ka lewat siuroe.
Malam uroe raya keu dua daerah kamoe di Garot - Pidie, nyan na budaya tet bude trieng. Ban sipanyang jalan Garot, di bineh krueng nyan meuriti aju bude trieng, geutamah ngen drom minyeuk geutanom ngat raya su. Ukuran beu geunta jantong-jantong wate i musu. Ureung jak nonton hana tatune dum geujak. Awak lam ranto khusus geuwoe geujak kalon bude trieng. Teuma di gop dari jioh dum geujak keunan, kamoe nyang toe rumoh hana jak keunan kon ka gura. Kakeuh tajo keunan siat. Macet subhanallah. Meusak-sak han jeut tapeugah. Ureung lage lam padang mahsya (padahai golom tajak u padang mahsya, tapi hai meunankeuh meunurot tadeunge surah dari Tgk malem).
Lanjut uroe raya keu dua sampo an uroe nyoe manteng meujak-meujak bak rumoh saudara lingka, jak sambong silaturrahmi.
Nyankeuh meunan uroe raya ulon tuan nibak thon nyoe. Kajeut 'ohnoe dile #pehtem ulon tuan kali nyoe. Soe na meheut jak ikot konteh peh tem neulangkah aju bak akun kak 
Teurimong geunaseh ka neutem baca tulesan ulontuan nyang jai that kekurangan nyoe.
