sumber
Jingki Hana Bajöe
Jingki hana bajöe
Nanggröe hana peutuwa
Boh Gadông Tablöe
Boh gadông tablöe ngön meuh
Boh aneuh tablöe ngön padé
Tajak beu trôh takalön beudeueh
Bèk rugöe meuh sakét haté
Jameun Ka Akhé
Jameun ka akhé hana lé tuah
Soh meunasah jeut-jeut sagöe
Nyang ramèe syit dua pat
Bak jambô madat ngön geulanggang tanjöe
Kiwieng Ateung
Kiwieng ateueng beuneueng peutupat
Kiwieng ureung peudeueng peutupat
Céng
Céng beusaré
Weuk beu sabé
Bagi beu adé
Ta ék U Glé
Ta ék u glé jikap lé rimueng
Tatrèn u krueng jikap lé buya
Tajak u laôt jikap lé paröe
Tawöe u nanggröe jipöh le bansa
Tamse ureueng khianat meuwöe laknat ateuh tubôh droe
Grôp Ciceue
Grôp ciceue grôp kudé
Di gôb ji grôp lam geudông meuh
Tanyöe ta grôp lam bagan ék
Bèk Ta Takôt
Bèk ta takôt keu angkatan lé
Jih heuet talô bak saboh masa
Meu han tatém di geutanyöe
Sit na söe-söe ureueng teuka
Grôp Guda
Grôp guda grôp lutông
Di gôp digrôp na söe tulông
Si Barang Kasöe
Si barang kasöe nyang lingkeue adat budaya, hukôm nanggröe. Bah pih aneuk cuco dröe wajéb keunöng dra
Naleueng Panyang
Tanyöng bak naleueng panyang
G = Pakön panyang dikah naleueng
N = Hana söe röt dilôn hai pöe
G = Pakön han ka röt dikah keubeue
N = Hana söe rabé dilôn hai pöe
G = Pakön han ka rabé dikah hai aneuk miet
N = Saket that pruet dilôn hai pöe
G = Pakön saket dikah hai pruet
N = Bu muntah dilôn hai pöe
G = Pakön muntah dikah hai bu
N = Kayèe buluet dilôn hai pöe
G = Pakön buluet dikah kayèe
N = Ujeuen rah dilôn hai pöe
G = Pakön ka rah dikah ujeuen
N = Cangguek yu dilôn hai pöe
G = Pakön ka yu dikah cangguek
N = Manok bathuep dilôn hai pöe
G = Pakön ka bathuep dikah manok
N = Kleueng tak dilôn hai pöe
G = Pakön ka tak dikah hai kleueng
N = Siwah tak dilôn hai pöe
G = Pakön ka tak dikah siwah
N = Galak-galak ku tak sigöe
Sumber : Pantôn Aceh, Razali Abdullah, 2009 : 53 - 56