Alah eu neuk pajan tawoe
Saweu poma droe karab puasa
Jino poma tinggai sidroe
Gata lam ranto mak kirem doa
Tawoe aneuk sithoen sigo
Saweu poma droe jino ka tuha
Kadang meuninggai poma jino
Tawoe aneuk droe gulam keureunda
Bak rumoh tuha poma sidroe
Preh gata woe eu bijeh mata
Rumoh tuha pusaka yah droe
Sinan poma droe lam masa tuha
Beumangat sabe gata lam ranto
Malam uroe mak kirem doa
Asai ka mangat eue bungoeng panjoe
Bahagai mak droe kukaloen gata
Hna mak lake neuk meuh dengeun moto
Tawoe sigo go neuk tasaeuweu poma
Mak peulheuh meucen keu gata sidroe
Sabe poma mou oeh ingat gata
Pulom ayah neuk ka awai geuwoe
Hanso puwoe neuk sie meugang keu poma
Pulom makmeugang puasa kato
Tinggai mak sidroe bak rumoh tuha
Sabe sabe mak lake bak po
Gata jino neuk beu meubahgia
Aneuk pih kana ineung sajan droe
Mak lake bak po deungeun ie mata
Kata mate mak gata hantroek woe
Keu gata sidroe han mak peudesya
Takirem doa bak tuhan sidroe
Lake keu mak droe beu ampoen desya
Beutroek tajak neuk bak jeurat mak droe
Bah sithoen sigo lam uroe raya
Katanom poma beuto ayah droe
Jeut mangat sigo kabaca doa
Allahurabi tuhan sidroe po
Neubie aneuk loen nyoe beu eek bahgia
Umue beupanyang beumangat asoe
Beu sampoe ue tanoh mulia
Yoeh mantoeng ubit poma peumano
Mak timang keudroe neuk dang dang raya
Hana meulaeen hate mak sidroe
Keugata sidroe sabe lam doa