Isang bagay na hindi ko lubos maunawaan
Sapagkat ako’y lumaki sa tabi ng karagatan
At doon sa laot ang aming pangisdaan
Mga panganib ay di namin uurungan.
Sya’y tulog pa habang kami ay gising na
O kay lamig ng hangin na dumadampi sa bangka
Kasabay ng alon na maligalig pa nga
Lahat ito ay tinitiis para sa aming pamilya.
Matingkad nitong sinag sa balat namin ay mahapdi
Isama pa ang tubig alat na sanhi ng aming buni
At kung mamalasin pa ay kay dalang ng mga huli
O kapalaran, kailan ba kami mapag-bubuti?
Upang huwag danasin ang hirap na masadlak
Kaya’t mag-aral kang mabuti at tamang landas ang itahak
Mahalin mo ang mga aklat upang di ka mapahamak
Lumipad kang mataas at ibuka ang iyong mga pakpak!
LARAWAN:
PIXABAY