alah hai doe, loen da idang
Ramphak kaye dang, ta glong keu bara
Beu rijang rayoek, poe banta seudang
Keunoe ta riwang, jak bila bangsa
Hai Jak kutimang, si meupreuk kumbang
Jeumpa bineh blang, peunudoh jiwa
Oh wate rayoek, bohate sayang
Ta tulong rakan, deungon syehdara
Jak loen dodi, loen dodi sayang
Boehate intan, si ayeum mata
Oh ban ka rayoek, gata loen idang
Bek sombong badan, ngon kawoem lingka
Alah kudang di, sudi loen paban
raja peusangan, di aceh jeumpa
ikot hai aneuk, qanun ngon reusam
Supaya teuntram, lam hudep gata
gawoe seunipreuk, meu preuk lam balang
Hai jantong badan, ban malem diwa
Tinguet hai aneuk, di ateuh rangkang
Poma peu idang, lam ayoen ija
reului taloe gle, angen lam padang
Aneuk loen sayang, beu taat gata
Lagee angen poet, beu leumbot badan
mandum ta rakan, adoe ngon apa
Jak loen dodi, bujue oen seuntang
Loen poet si reugam, si campli lada
oh rayoek aneuk, ikoet panutan
Lagee tauladan, rasul mustafa
Allah hai poe loen, yang agong rahman
Maha Penyayang, Allah Taala
Rahmat ka neubri, leupie limpahan
Uroe ngon malam, keu kamoe hamba
Sukat sinaleh, pade bineh blang
Geucok si eumpang, neujok keu miwa
Seusama kawoeng, tulong eo sayang
Ngon kemudahan, hudep sijahtera
Liwa loen cutiet, seuit lam karang
Lagee sang bawang, di dalam raga
Meunah peunutoh, saloeh poe intan
Keu banta seudang, si ayeum mata
Tajak saban sare, eo bohate puga ladang
Hudep beu meuhase, beu ade ngon jabatan
Hate bek na kurok bek brok dengon rakan
Akhe uloen top pacok, uloen jok ngon wassalam.
Follow Me 