Maaninag ko ikaw
sa nagakalayo nga bulak
sang albor kon Mayo
nadumduman ko pa
pirmi mo ako ginahimuan
sang mga tinuhog nga talulot
para ipungi sa altar sadto
makita ko ikaw
sa nagakadagas nga dahon
sang dapdap kon Marso
ang imo nawong
nabagtik nga katunggan
nga ginapalid sang hangin
sa nga nauna nga tinulo
sang ulan sa Agosto
mabatyagan ko
ang matugnaw nimo nga palad
sa akon agtang
kag sa pagsubay sa mga maarumiraw
nga kaagahon sang Disyembre
ikaw ang akon iwag nga kabugwason
indi ko mahangpan
kon ano ang may ara sa Septembre
magluwas sa nagaporma
nga mga biraho sang mais
nagamagdos nga humayan
nagaagaw nga ulan kag init
indi nakon ikaw sarang masalapuan!
