Hello my country people. Hope say coro no reach ya syd sha o. Nah baba God hand we dey ooo. As I dey so, the jolly way full my body ehn, no be here. Me I just say make I fire one tori way I sure say go make your day o.
You see, nah one of my very adventurous Christmas outing. As we all know nah, this kind thing be like traditional culture way we all must find one place or the other to hang out. This one happen last two years. I be don dey find way to go see my secondary school classmate way dey stay for ogun state. And since I dey maintain for lag, I just dey consider time and transport. But on this Christmas day, me and my two other niggas don arrange to go see this ogun state dude, something like a get together of old school friends.
As we gon start to leg, we don already call the guy over there to yan ham the matter. We even tell ham make he arrange better level for us o. The journey take us two hours because as guys in group nah, we no waka straight at all🤣. As we reach there, you know ogun state nah, most of the area still dey develop and my guy them family go get house for the inside inside way still dey full of Bush and under construction. So, we know watin we dey expect and we like ham.
Chaii...omo, see correct kitting. All of us get level. As we dey bounce, gals dey fall. As we reach there, we con greet my guy and him maale. He invite us inside him room. As we dey catch up with normal guys greeting way dey always carry abuse follow body nah, this one of my guy way follow us come see the small bed way dey this guy house ooo.. the bed sheet gan, nah confam!
As the guy way we con visit go get us some small level, nah him my guy jump with the highest lifting and full confidence on top the bed o. Omo, as he land, all of us hear bamb💥💥💥💥. Chaii e be like say dem back hammer for ground. My guy way jump on the bed dey stiff. He no move, he no talk. He just dey look us as we dey look ham in surprise say watin happen. My guy way we con visit run enter, see watin don happen con shout ahhh... "Guy, nah cement dey under ooo". 😯😯😯WTF!!!.
We quickly comot the guy for bed, comot the bedsheets and see just cement ooo instead of bed foam. Chaii, all of con start to laugh. My guy way don fall victim just dey. He no fit laugh, he no fit cry. 🤣🤣🤣 Throughout that day, my guy no get himself. He just dey waka like person way wan born pikin. Him back be like one way don break...😅💔
What a holiday!
Thank you for una time. Una free to take any action una wan fire. E no mean if na Upvote, Comment and Reblog. Up Ninja! We die here😅
Disclaimer: Characters within the image are from Pixels and the design is done by me.
