Birthday Greetings | سالگرہ کی مبارکباد

ہمارے معاشرے میں چاہتے نہ چاہتے ہوئے بھی ایک رواج بہت زیادہ عام ہو چکا ہے، وہ ہے سالگرہ کی مبارک باد دینا اور اس موقع پر اپنے عزیزوں کو ڈھیروں خوشیوں بھرے پیغامات سے نوازنا. بعض لوگ جو آپس میں ایک دوسرے کے قریب رہتے ہیں، وہ تو باقاعدہ برتھ ڈے سیلیبریشن کرتے ہیں، کیک لاتے ہیں، اس کے علاوہ دیگر قسما قسم کی ایکٹیویٹیز کرتے ہیں اور خوب انجوائے کرتے ہیں. یوں تو ہر ہر شخص کی سالگرہ کی ایک الگ ہی کہانی ہوتی ہے. جس پر سینکڑوں مضامین لکھے جا سکتے ہیں. میرا مقصد آج کی بلاگ میں سالگرہ کی روداد نہیں. بلکہ سالگرہ کی مبارکباد پر بات کرنا ہے. ہمارے مشرقی معاشرے میں سالگرہ زیادہ تر یا تو بچوں کی منائی جاتی ہے یا پھر لڑکیوں کی. لڑکوں کی سالگرہ عام طور پر نہیں منائی جاتی. ہاں جو گھر کے لاڈلے ہوں تو ان کو بھی یہ پروٹوکول مل ہی جاتا ہے. مگر عمومی طور پر لڑکے اس میں دلچسپی نہیں لیتے. البتہ سالگرہ کی مبارکباد سبھی مرد و عورت بخوشی ضرور وصول کرتے ہیں.

کیا ہو اگر مبارکباد دینا بھول جائیں؟

اب اکثر ہوتا یہ ہے کہ ہم سب اپنے پیارے عزیزوں کی تاریخ پیدائش اپنے پاس محفوظ کرکے رکھتے ہیں تاکہ مبارک باد کے موقع پر سب سے پہلے ہم ہی اسے مبارکباد دیں. اکثر لوگ عین رات کے 12 بجے مبارکباد دیتے ہیں. یہ بھی حقیقت ہے کہ جس کی سالگرہ ہوتی ہے وہ ازخود بھی منتظر ہوتا ہے کہ کون اسے سب سے پہلے مبارکباد دے گا. مبارکباد کیا ہوتی ہے. دراصل اپنائیت کا ایک احساس ہوتا ہے. دعائیں ہوتی ہیں. نیک خواہشات ہوتی ہیں. جن کا تبادلہ سالگرہ والے دن کیا جاتا ہے. اس خاص موقع کا انتظار لوگ اپنے خاص الخاص اور دل کے قریب رہنے والے لوگوں کے لیے سارا سال کرتے ہیں. لیکن بدقسمتی سے کبھی کبھار ایسا بھی ہوجاتا ہے کہ سارا سال یاد رکھنے کے باوجود کسی مصروفیت کی وجہ سے یا بے دھیانی کی وجہ سے عین موقع پر ہم یہ بھول جاتے ہیں کہ آج کسی کی سالگرہ ہے. اس بات کا اس قدر پچھتاوا ہوتا ہے کہ مت پوچھیں. اکثر ایسا ہوتا ہے کہ آپ دن بھر انتظار میں رہتے ہیں، مبارکباد کا میسج بھی تیار کرکے لکھ لیتے ہیں، خوبصورت سے تصاویر بھی ڈیزائن کر لیتے ہیں اور عین رات کو 12 بجے سے کچھ دیر قبل آپ کی آنکھ لگ جاتی ہے. پھر صبح اٹھ کر جب آپ دیکھتے ہیں کہ آپ کی پسندیدہ شخصیت کو اور لوگوں نے آپ سے پہلے وش کر دیا ہے تو یقیناً دل دکھتا ہے اور وہ شخص اپنے آپ کو کوسنے لگتا ہے.

یاد رکھنے کا طریقہ:

اب ایسی صورتحال میں وہ محاورہ یاد آتا ہے کہ اب پچھتاوے کیا ہوت، جب چڑیا چگ گئیں کھیت. جب پانی سر سے گزر چکا ہو تو پھر پچھتانے سے کیا فائدہ. یا جیسے اردو زبان میں ضرب المثل ہے کہ گیا ہے سانپ نکل، اب لکیر پیٹا کر. جب سانپ ہاتھ سے چھوٹ گیا تو اب لکیر پیٹنے سے کیا فائدہ. اسی طرح جب موقع ہاتھ سے نکل گیا تو اب پچھتانے سے کیا فائدہ. اس لیے سب سے پہلے تو میں یہ مشورہ دوں گا کہ اگر آپ کسی کو سالگرہ کی مبارکباد دینا بھول گئے ہیں تو اس پر پچھتانے سے کوئی فائدہ نہیں ہوگا. آپ رات کو 11 بجے احتیاطاً الارم لگا لیتے یا ایک سے کام نہیں بنتا تو دو تین الارم سوا گیارہ بجے، ساڑھے گیارہ بجے، پونے بارہ بجے اور بارہ بجنے سے پانچ منٹ قبل کا الارم بھی لگایا جا سکتا ہے. اس کے علاوہ ایک بہت مزے کا طریقہ گوگل کیلنڈر ہے. اگر آپ کیلنڈر کو روزانہ دیکھنے کے عادی ہیں تو یہ آپ کو آپ کے پیاروں کی سالگرہ بھی یاد کرواتا رہتا ہے. یہ طریقہ بہت آسان ہے. آپ صرف یہ کریں کہ کسی بھی کانٹیکٹ کو اپنے موبائل میں سیو کرتے وقت ایڈ برتھ ڈے کا آپشن استعمال کریں اور پھر نمبر سیو کر لیں. اگر آپ کے پاس پہلے سے نمبر سیو ہے تو آپ اسے edit کرکے اس میں برتھڈے یا اینیورسری وغیرہ کی تاریخ ایڈ کر سکتے ہیں. گوگل اسے خودکار طریقے سے گوگل کلینڈر میں ایڈ کر دیتا ہے. جس سے آپ کو یاددہانی ہو سکتی ہے کہ کب کس دن کس کی سالگرہ ہے. علاوہ ازیں آپ اس میں قبل از وقت نوٹیفیکیشن دینے کا آپشن بھی استعمال کر سکتے ہیں.

سالگرہ کی مبارکباد کا مقصد:

بعض لوگ اس دن کی مبارکباد کو دل پر لے لیتے ہیں اور پھر اسی بنیاد پر لڑائی جھگڑا بھی کرتے ہیں. حالانکہ یہ خوشی کا موقع ہے. خوشی کے موقع پر تو چھوٹی موٹی کمی کوتاہی کو صرف نظر کر دیا جانا چاہیے. اس لیے اگر آپ کو کسی نے وش نہیں بھی کیا یا دیر سے مبارکباد دی تو آپ اگلے کی مجبوری سمجھ کر اسے دیر آید درست آید کے مصداق قبول کریں. اور بالفرض اگر کوئی بھول جاتا ہے یا قصداً آپ کو مبارکباد نہیں دیتا، تب بھی اس سے ناراض ہونے کی قطعاً کوئی ضرورت نہیں ہے. مبارکباد مقصود نہیں بلکہ اگلے کی محبت، اس کا خیال اور آپ کا سکون اصل مقصودی چیز ہے. ہمارے دل کے بہت قریب اکثر وہ لوگ ہوتے ہیں جن کی خوشی میں ہم بذات خود بنفس نفیس شریک نہیں ہو پاتے مگر ہم اپنے جذبات میسجز کی صورت میں ان تک ضرور پہنچاتے ہیں. سالگرہ کے موقع پر نہ سہی، مگر گاہے گاہے اپنے جذبات سے ہم اگلے کو آگاہ رکھتے ہیں. اس لیے اگر کوئی آپ کی سالگرہ کے دن آپ کو مبارکباد دینا بھول گیا ہے تو غم نہ کریں. یہ دیکھیں کہ اس کا رویہ پورا سال کیسا رہا؟ اگر وہ پورا سال آپ سے وفادار رہا ہے تو اس کی ایک دن کی بھول چوک معاف کر دیں. اور اگر وہ پورا سال آپ سے بے نیاز رہا ہے تو ایک دن مزید سہی. اس میں پریشان ہونے کی کوئی بات سرے سے ہے ہی نہیں. لہٰذا خوش رہیں. خوشیاں بانٹیں.