Independence Day Special: Pride of Pakistan | یوم آزادی کی خاص پیشکش: فخرِ پاکستان

پیرس میں منعقد ہونے والا عالمی اولمپکس اپنے اختتام کو پہنچا. جس میں بلا مبالغہ ہزاروں ایتھلیٹس نے اپنی مہارتوں کے جوہر دکھا کر عالمی سطح پر پذیرائی حاصل کی. اس اولمپکس کے انعقاد کے اولین دنوں میں اس کے انتظامات پر بہت تنقید کی گئی. کہا یہ جا رہا تھا کہ گزشتہ سال قطر میں ہونے والا اولمپکس کا مقابلہ بہترین مینجمنٹ کا عالمی مظاہرہ تھا. لیکن جوں جوں یہ مقابلہ اختتام کو پہنچ رہا تھا، نئی نئی شخصیات کے ٹیلنٹ سامنے آ رہے تھے اور رفتہ رفتہ وہ تنقید کہیں دب کر رہ گئی اور تالیوں کی گونج کے ساتھ یہ اولمپکس اپنے اختتام کو پہنچا. سر فہرست تو امریکہ اور چین کے کھلاڑی رہے، جو گولڈ میڈلز جمع کرنے کی دوڑ میں پیش پیش تھے. البتہ اسی دوڑ میں ذرا سا نیچے جا کر ایک ترقی پذیر ملک کا وہ غریب محنتی نوجوان بھی تھا، جو اپنا سب کچھ داؤ پر لگا کر داؤ کھیلنے گیا تھا. اس امید پر کہ وہ اپنے ملک کا نام لیڈر بورڈ میں درج کروائے گا. اپنے اس شوق اور خواب کی تکمیل کے لیے اس نے دن رات ایک کر دیے، مگر اس کے معاشی حالات اس کے خواب کی تکمیل میں رکاوٹ بنے رہے. لیکن وہ بغیر رکے محنت کرتا رہا اور کسی نہ کسی طرح امداد باہمی کے تحت بالآخر اپنے ملک پاکستان کی نمائندگی کے لیے پیرس اولمپکس میں پہنچ گیا.

ارشد ندیم:

جی. ہاں. میری مراد فخرِ پاکستان، عالمی اولمپکس 2024 میں جیویلین تھرو کے گولڈ میڈلسٹ، جناب ارشد ندیم ہیں. ارشد ندیم پاکستان کے صوبہ پنجاب کی ایک چھوٹی سی تحصیل میاں چنوں کے ایک چھوٹے سے گاؤں چک 101 میں سن 1997 میں پیدا ہوئے. بچپن ہی سے کھیلوں میں حصہ لینے کا شوق تھا. سو پاکستانی عوامی رجحان کے مطابق وہ کرکٹ کا حصہ بنے. انہوں نے کافی عرصہ کرکٹ کھیلی. پھر اپنے والد کے کہنے پر ایتھلیٹ بننے کا فیصلہ کر لیا اور پیچھے مڑ کر نہ دیکھا. انفرادی شوق تک تو بات ٹھیک تھی، مگر جب بات آئی عالمی مقابلوں میں نمائندگی کرنے کی، تو ارشد ندیم کو کئی مشکلات کا سامنا کرنا پڑا. ملک پاکستان میں جہاں صحت مند کھیلوں کے رواج کا فقدان ہے، وہیں پر ساتھ ہی کھیل کا سامان انتہائی مہنگا ہے. ارشد ندیم کے لیے ایسے موقع پر نیزہ بازی کی مشق کرنا مشکل ہوتا چلا جا گیا. مگر وہ ہمت ہارے بغیر اپنے مقصد کی جانب قدم بڑھاتے رہے. حتیٰ کہ یہاں تک کہا جا رہا ہے کہ اسی سال جنوری کے مہینے میں ان کے پاس ایک نیزہ خریدنے کی رقم نہ تھی. چنانچہ ان کے رشتہ داروں نے ان کے ساتھ تعاون کیا اور انہیں اولمپکس کی تیاری کا موقع ملا. افسوس کے ساتھ پاکستانی سپورٹس بورڈ کی جانب سے ان کے جانے میں کسی قدر دلچسپی نہیں دکھائی گئی. صرف ارشد ندیم ہی کیا، کسی اور ایتھلیٹ کو بھی پاکستان سے عالمی مقابلوں میں نمائندگی کے لیے بھیجنے پر سپورٹس بورڈ کی دلچسپی دیکھنے میں نہیں آئی.

اولمپکس کی تاریخ میں یادگار دن:

آخر کار ارشد ندیم کی دن رات کی محنت رنگ لے آئی اور انہوں نے 8 اگست کی شب 92.7 میٹر طویل جویلین تھرو کر کے اولمپک کا 118 سالہ ریکارڈ توڑ دیا اور پاکستان کے لیے گولڈ میڈل جیت لیا. یہ لمحات ہر پاکستانی کے لیے بہت خوشی کے لمحات تھے. عرصہ دراز بعد پاکستانی کچھ لمحات کے لیے اپنے سارے دکھ درد بھول گئے. یہی ارشد ندیم کی کامیابی تھی. جونہی ارشد ندیم کے گولڈ میڈل جیتنے کی خبر پاکستان پہنچی تو دھڑا دھڑ ارشد ندیم کے لیے لاکھوں اور کروڑوں کے انعامات کے اعلانات ہونے لگے. حکومت پنجاب نے 10 کروڑ اور حکومت سندھ نے 5 کروڑ روپیہ کے انعام کا اعلان کیا. 50 ہزار ڈالر ورلڈ ایتھیلیٹس کی جانب سے انعام کا اعلان کیا گیا. ٹویوٹا کی جانب سے کرولا کراس ہائبرڈ الیکٹرک کار کا تحفہ، آلٹو کار، سونے کا تاج، مفت پیٹرول، گیس فری، اہل خانہ سمیت عمرہ کا ٹکٹ اور نہ جانے کیا کچھ ہے جو ان پر نچھاور کیا جا رہا ہے. بلکہ سب سے بڑھ کر صدر پاکستان نے ارشد ندیم کے لیے سول ایوارڈ ہلال امتیاز دینے کا اعلان بھی کیا ہے، جبکہ 14 اگست کو جشن آزادی کی مناسبت سے ان کی خصوصی تصویر والا عزم استحکام ڈاکٹ ٹکٹ پہلے ہی جاری کیا جاچکا ہے. سچ کہتے ہیں: ناکامی یتیم ہوتی ہے اور کامیابی کے کئی باپ ہوتے ہیں.

عزم اور توکل:

ارشد ندیم کی کامیابی سے پاکستان میں ایتھیلیٹس کو ایک نیا عزم اور ہمت ملے گی. وہ لوگ جو بہت سی مشکلات کو دیکھ کر ہمت ہار گئے تھے، ارشد ندیم کی کامیابی نے ان میں ایک نئی روح پھونک دی ہے. ارشد ندیم کو کئی غیر ملکی ٹیمز کی جانب سے کھیلنے کی آفرز آئیں. مگر انہوں نے ہمیشہ پاکستان کو پہلے نمبر پر رکھا. اپنے ملک کے لیے کھلے اور جیتے. کھیل کے میدانوں میں ابھرتے ہوئے نوجوانوں کے لیے وہ ایک زندہ مثال ہیں. ان کی داستان سے ہمیں جدوجہد، عزم، ولولہ، انتھک محنت، مشقت، صبر و تحمل، برداشت اور پریشر کا سامنا کیسے کرنا ہے؟ سب سیکھنے کو ملتا ہے. سب سے بڑھ کر ارشد ندیم کا ملنسارانہ رویہ انہیں سب سے ممتاز کرتا ہے. اتنی بڑی کامیابی کے بعد بھی ذرہ بھی ان کے چہرے پر تکبر، غرور، نخوت یا بڑے پن کی کوئی جھلک نظر نہیں آئی. وہ جیسے گئے تھے، اسی انداز میں محبتیں بانٹ کر محبتیں سمیٹنے واپس آئے. بلاشبہ وہ ایک مثالی کردار ہیں. جو نہ صرف جسمانی طور پر خود کو مضبوط رکھے ہوئے ہیں بلکہ روحانی طور پر بھی اپنے رب سے بہت قریب ہیں، جس کی واضح مثال ان کا گولڈ میڈل جیتتے ہی سجدہ شکر بجا لانا تھا. پاکستان پہنچنے پر بھی وہ اپنے گھر جانے سے پہلے علماء کرام اور بزرگوں کی دعائیں لینے پہنچے. مایوسیوں کے دور میں ارشد ندیم امید کی کرن بن کر ابھرے ہیں. امید ہے پاکستان کے سبھی نوجوان ان کو دیکھتے ہوئے کچھ کر دکھانے کا عزم کریں گے اور کر دکھائیں گے.