Small Joys | چھوٹی چھوٹی خوشیاں

غموں سے بھرے اس جہان میں، جہاں ہر گزرتے لمحے کے ساتھ کوئی نیا حادثہ رونما ہو رہا ہو، ضرورت پڑتی ہے کسی ایسی وجہ کی، کسی ایسی امید کی، جس کے سہارے پر، جس کی امید پر زندگی کا پہیہ چلایا جا سکے. عجیب بات ہے کہ اس دنیا میں جتنے بھی لوگ ہم سے پہلے آئے یا ہمارے بعد آئیں گے، ہر ایک نے اپنے ماحول اور زمانے کے حساب سے مشکلات جھیلی ہیں. ہم بھی مشکلات جھیل رہے ہیں. لیکن سوال یہ پیدا ہوتا ہے کہ کیا ہمارا جسم اور دماغ اس سب کا متحمل ہوسکتا ہے؟ ہرگز نہیں. ظاہر سی بات ہے کہ اگر مشکلات پے درپے آتی رہیں تو سیلابی موجوں کے آگے بندھے ہوئے بند کی طرح کسی وقت انسان کے ضبط کا بندھن ٹوٹ جاتا ہے. پھر یا تو وہ کھل کر روتا ہے، یا گھٹ گھٹ کر جیتا ہے. دونوں ہی صورتوں میں وہ اپنا نقصان کرتا ہے. ہاں کچھ لوگ یہ ضرور کہتے ہیں کہ کھل کر رو لینے سے دل ہلکا ہو جاتا ہے. لیکن میں سمجھتا ہوں کہ رونا انسان کی مجبوری کو ظاہر کرتا ہے. جب کوئی شخص کسی کام سے عاجز آجائے، یا ہار مان جائے تو اس کے پاس آخری آپشن رونا ہی رہ جاتا ہے. یہ خام خیالی ہے کہ اس سے دل ہلکا ہوتا ہے، بلکہ رونے کے بعد انتقام کی جو آگ سینے میں جلتی ہے وہ کبھی ختم نہیں ہوتی.

خوشی کا احساس:

مانا کہ مشکلات بہت ہیں. پریشانیاں، تکالیف، بیماریاں، رویے اور دیگر اتنی زیادہ وجوہات ہیں اداسی کی کہ اس صورتحال میں کسی انسان کے لیے طبعی طور پر خوش رہنا بظاہر ممکن نظر نہیں آتا. تو اب ہمیں کیا کرنا چاہیے؟ کیا ہم ہار مان جائیں؟ یا پھر ان اداسیوں کا کوئی حل بھی ہے؟ آج کی بلاگ میں اسی موضوع پر میں بات کرنے جا رہا ہوں. بسا اوقات ایسا ہوتا ہے کہ بڑی سے بڑی خوشی کی خبر سن کر بھی ہمارے دل میں سرور کی وہ کیفیت پیدا نہیں ہوتی جو ہونی چاہیے اور کبھی کبھار ایسا ہوتا ہے کہ کسی پھیکے اور ٹھنڈے لطیفے پر بھی ہم قہقہے لگا رہے ہوتے ہیں. دونوں صورتوں میں یقیناً ماحول اور حالات کا بہت عمل دخل ہے. اگر ہم اپنے ارد گرد کا ماحول اپنے مزاج کے مطابق رکھتے ہیں تو ہمیں خوشی کا احساس بھی ہوتا ہے. فرض کیجیے کہ آپ دوستوں کی محفل میں بیٹھے ہیں، تو آپ چھوٹی چھوٹی بات پر بھی کھلکھلا کر ہنس اٹھتے ہیں. لیکن اگر آپ آفس میں اپنے باس کے سامنے بیٹھے ہیں تو آپ انتہائی سنجیدگی سے اس کی بات سنیں گے. پتہ یہ چلا کہ خوشی کا احساس اور اس کا اظہار بھی اپنی من مرضی کی جگہ اور حالات کا محتاج ہوتا ہے. اس لیے اپنی روز مرہ کی زندگی کا کچھ حصہ کسی ایسے کمفرٹ زون میں ضرور گزاریں جو آپ کے دل و دماغ کا بوجھ ہلکا کر دے.

مصنوعی خوشی:

یہ تو بات ہو گئی خوشی کو انجوائے کرنے کی، لیکن یہاں یہ سوال جنم لیتا ہے کہ اگر کسی شخص کے پاس کوئی خوشی کی خبر ہے ہی نہیں تو وہ کس بات پر خوش ہوگا؟ میں سمجھتا ہوں کہ اس کا جواب بھی وہ خود تلاش کر سکتا ہے. اگر اسے خوش رہنے کے لیے کوئی ظاہری سبب نہیں مل رہا تو اسے خود اسباب اختیار کرنے پڑیں گے. خود کو خوش رکھنے کے لیے ایسے اقدامات کرنے ہوں گے جن سے ہمارے اندر کا سٹریس ختم ہو جائے. چھوٹی چھوٹی خوشیاں تلاش کرنی ہوں گی. کسی چھوٹی سے چھوٹی بات پر خود کو خوش رکھنا ہوگا. اس کے کئی اسباب ہو سکتے ہیں. مثلاً: آپ کسی تفریح گاہ جاتے ہیں، یا دوستوں کی محفل میں جاتے ہیں، یا گھومنے پھرنے اور سفر کرنے جاتے ہیں، یا محض کھیل تماشہ دیکھتے ہیں حتیٰ کہ اگر آپ انٹرنیٹ پر مزاحیہ ویڈیوز دیکھتے ہیں تو یہ بھی آپ کو خوش رکھنے میں بہت حد تک مددگار ثابت ہوتی ہیں. مختلف قسم کے کھیل ہماری دلچسپی اور خوشی کا باعث بن سکتے ہیں. مجھے یاد ہے کچھ دن قبل میں اپنے گھر سے کچھ سامان لینے کے لیے نکلا تو واپسی پر قریب میں واقع ایک پیڈسٹرین برج پر سے گزرا. وہاں میں نے دو گداگر بچوں کو، جو لوگوں سے بھیک مانگ کر اپنا گزر بسر کرتے ہیں، اپنی خود کی بنائی ہوئی خوشی میں مست دیکھا. میں نے ان کی اجازت سے ان کی تصویر بھی لی. یقیناً آپ سوچ رہے ہوں گے کہ آخر بھکاری بچے کس بات پر خوش ہوں گے تو جناب ان کی کوئی پیسوں کی لاٹری نہیں نکلی تھی بلکہ انہوں نے محض ایک سادہ سی رسی برج کے اوپر موجود آہنی سلاخوں سے گزار کر اپنے لیے جھولا بنا رکھا تھا اور باری باری اس پر جھول رہے تھے. انہیں خوش دیکھ کر تو میں ایک لمحے کو اپنی پریشانیاں بھی بھول گیا.

خوشیاں بانٹیں:

میں نے ابھی ابھی کہا کہ بچوں کو خوش دیکھ کر میں اپنی پریشانیاں بھول گیا. یہ فطری امر ہے کہ جب کوئی شخص کسی دوسرے شخص کو خوش کرنے کی کوشش کرتا ہے تو بدلے میں وہ خود بھی خوش ہوجاتا ہے. آپ سوچیں کہ جب آپ کسی کو گفٹ دیتے ہیں، آپ اس سے توقع کرتے ہیں کہ وہ آپ کا گفٹ دیکھ کر خوش ہو. اگر وہ خوشی کا اظہار کر دے تو آپ بھی خوش ہو جاتے ہیں، لیکن اگر گفٹ دے کر بجائے خوش ہونے کے، وہ آپ کو نظر انداز کر دے تو یقیناً یہ گفٹ بھی آپ کو خوشی نہیں دے سکے گا. ہم سب اگر آپس میں ایک دوسرے کی خوشیوں کا اسی طرح خیال رکھیں تو یہ دنیا جنت کا نظارہ پیش کرنے لگے گی. جیسے باپ اپنے بچوں کے لیے اپنا سب کچھ داؤ پر لگا دیتا ہے. دن رات محنت کرتا ہے، مگر جب گھر لوٹتا ہے اور بچوں کی خوشی دیکھتا ہے تو اس کی ساری تھکان کافور ہو جاتی ہے. بلکہ سب سے بڑھ کر مثال کسی عاشق کی دی جا سکتی ہے جو اپنے محبوب کی خوشی کی خاطر اپنا سب کچھ قربان کر دیتا ہے. اس کی ہر خواہش کو پورا کرتا ہے. اس کے حکم اور چاہت کے مطابق زندگی گزارتا ہے. گویا اس کی زندگی سراسر اپنے محبوب کی خوشی میں ہی مضمر ہوتی ہے. جب اس کا محبوب خوش ہوتا ہے تو یہ عاشق بھی خوش رہتا ہے. گویا محبوب کی خوشی میں اس کی خوشی، اور محبوب کے دکھ میں اس کو دکھ ہوتا ہے. بالکل اسی طرح اگر ہم اپنے آس پاس موجود لوگوں کو خوش رکھنا شروع کر دیں تو وہ بھی خوش ہوں گے اور ہم بھی خوشی کا احساس پائیں گے.