The Detriments of Begging/ Charity | بھیک کے نقصانات

یقیناً آپ عنوان پڑھ کر چونک گئے ہوں گے کہ وہ شخص جو از خود ایک فلاحی تنظیم کا متحرک رکن ہے. وہی آج فنڈ ریزنگ کے خلاف بات کر رہا ہے. تو اس میں حیرانی کی کوئی بات نہیں کیونکہ آج میں مدد کی نہیں بلکہ بھیک کی بات کرنے جا رہا ہوں. جیسا کہ آپ سب کے علم میں ہے کہ بے روزگاری ایک ایسا مسئلہ ہے جو دنیا بھر میں ہر چھوٹی بڑی عمر کے مرد و خواتین کو اکثر پیش رہتا ہے. ہر شخص اپنی زندگی گزارنے کے لیے کسی قسم کے روزگار یا ذریعہ معاش کا محتاج ہوتا ہے. ظاہر سی بات ہے کہ پیسے ہوں گے تو وہ کچھ کھائے پیے گا اور زندگی جیے گا. اگر کسی کے پاس ذریعہ معاش نہیں ہے تو وہ اسے حاصل کرنے کے لیے جدوجہد کرے گا. کام سیکھے گا. محنت کرے گا مشقت کرے گا اور اسی محنت و مشقت کے نتیجے میں وہ آہستہ آہستہ اپنی زندگی کو خوشحال بناتا چلا جائے گا. پھر جب وہ خود مستحکم ہو جائے گا تو اپنے ارد گرد موجود غریبوں کی بھی مدد کر سکے گا. ان کا سہارا بنے گا. ان کی زندگیوں میں بھی خوشحالی لانے کا سبب بنے گا. یہاں تک تو بات بالکل درست ہے. لیکن آگے جو میں بیان کرنے جا رہا ہوں. وہ ایک عالمی مسئلہ ہے، خصوصی طور پر پاکستان میں اور بالخصوص میرے شہر کراچی کا یہ ایک بہت بڑا مسئلہ ہے اور وہ ہے محنت مشقت سے لوگوں کو ہٹا کر مفت خوری کی عادت لگانا. جی ہاں. بھیک.

این جی اوز کا کردار:

پاکستان جیسے پسماندہ اور ترقی پذیر ملک میں ڈھیروں کے حساب سے ایسی غیر سرکاری تنظیمیں موجود ہیں جو عوامی فلاح و بہبود کے کاموں میں اپنا سرمایہ خرچ کرتی ہیں. یہ تنظیمیں مختلف علاقوں میں مختلف پراجیکٹس پر کام کرتی ہیں. کہیں کھانے کی کمی کو پورا کیا جاتا ہے، کہیں پانی کی کمی کو، کہیں راشن دیا جاتا ہے، کہیں مفت ہسپتال بنا کر نادار و مفلس لوگوں کا علاج کیا جاتا ہے. ہر جگہ مختلف لوگوں کے یہ تنظیمیں کام کرتی ہیں. بلاشبہ ان کی خدمات کو سراہا جانا چاہیے کہ وہ اس معاشرے میں کام کر رہی ہیں جہاں پر گزارہ کرنا انتہائی مشکل ہے. لوگوں کی معاشی ترقی میں ان کا کردار ناقابل فراموش ہے. کئی لوگ ایسے ہیں، جن کے پاس رہنے کو گھر نہیں یا کھانے کو کچھ نہیں. مگر ان اداروں کی بدولت بہت سے لوگوں کو گھر بار، عطیہ صدقہ یا کچھ کھانے کو لازمی مل جاتا ہے. جس سے وہ اپنی گزر بسر کر پاتے ہیں. علاج معالجے کی سہولیات مل جاتی ہیں. بچوں کی تعلیم کے اخراجات کے لیے اسکالر شپس مل جاتی ہیں. شادی بیاہ اور عید و تہوار وغیرہ جیسی تقریبات کے موقع پر بھی مختلف تنظیمیں اپنی اپنی بساط کی حد تک کام کرتی رہتی ہیں.

فلاحی اداروں کا عوام کے ذہنوں پر منفی اثر:

ہونا تو یہ چاہیے تھا کہ فلاحی اداروں کی خدمات کے نتیجے میں غربت اور پسماندگی ختم ہو جائے. لوگ رفتہ رفتہ خود کفیل ہوتے چلے جائیں اور امداد لینے کے بجائے امداد دینا شروع کر دیں. مگر ہمیں اپنے معاشرے میں اس کے برعکس صورتحال دکھائی دیتی ہے. مفت خوری اور بھیک کی عادت نے محنت کر کے کمانے کا جذبہ ختم کرکے رکھ دیا ہے. ظاہر سی بات ہے. جب پکی پکائی روٹی بغیر محنت کے مل رہی ہو تو کیونکر کوئی اپنی جان کھپائے گا؟ چنانچہ مفت دسترخوانوں پر رش بڑھتا چلا گیا. این جی اوز بڑھتی چلی جا رہی ہیں پھر بھی محتاج بجائے کم ہونے کے مزید ہوتے چلے جا رہے ہیں. بلکہ اکثر لوگوں نے تو این جی اوز کی آڑ میں بدعنوانی کا دھندا شروع کر رکھا ہے. چونکہ این جی اوز کا باقاعدہ آڈٹ حکومتی نگرانی میں نہیں ہوتا تو کرپشن کرنے والے مافیا کے لیے این جی او کسی بڑی سہولت سے کم نہیں. این جی اوز کے ذریعے سے وہ اپنا سارا کالا پیسہ سفید کر لیتے ہیں. دوسری جانب عوام کشکول پھیلائے ان این جی اوز کی طرف دست سوال دراز کیے رکھتی ہے. جس کے نتیجے میں حقیقی محتاج بھی محروم ہو جاتے ہیں. سارا صدقہ اور خیرات وہ لوگ لے اڑتے ہیں جو درحقیقت اس کے مستحق بھی نہیں ہوتے.

ہمارا معاشرتی شعار اور اس کا ناجائز فائدہ:

اس میں کوئی شک نہیں کہ پاکستان کے مالدار لوگ غریبوں اور ناداروں کی امداد کے لیے بے بہا پیسہ خرچ کرتے ہیں. ہم فطرتی طور پر نرم دل واقع ہوئے ہیں. اس لیے مجھے نہیں لگتا کہ پاکستان سے زیادہ خیراتی کام کسی اور ملک میں ہوتے ہوں گے. ابھی حال ہی میں رمضان المبارک کے مقدس مہینوں میں ہم نے مشاہدہ کیا کہ ہر سڑک، چوراہے، گلی، محلے اور ٹاؤن میں جابجا دسترخوان لگائے گئے. عید الفطر کی خوشیوں میں غریبوں کو شریک کرنے کے لیے مالدار مسلمانوں نے خوب خرچ کیا. روزانہ کی بنیاد پر صرف شہر کراچی میں کروڑوں روپے کی خیراتی سرگرمیاں وجود پذیر ہوتی ہیں اور لوگ دل کھول کر خرچ کرتے ہیں. لیکن بعض دھوکے باز لوگ اس دریا دلی کا ناجائز فائدہ اٹھاتے ہیں. آئے روز ایسے واقعات دیکھنے میں آتے ہیں کہ صحیح سلامت ہاتھ پیر رکھنے والے لوگ خود کو معذور ظاہر کرکے بھیک مانگ رہے ہوتے ہیں. لوگ اپنے اثاثہ جات چھپا کر کسی مستحق کا مال کھا جاتے ہیں. حتیٰ کہ فاؤنڈیشن کے نام پر فنڈ لے کر سارا پیسہ خود ہی کھا جاتے ہیں. جب خرچ کرنے والے کو یہ پتہ چلتا ہے کہ اس کا مال مصرف میں نہیں لگا تو وہ مایوس ہو جاتا ہے. چنانچہ وہ امدادی سرگرمیاں بند کر دیتا ہے جس کے نتیجے میں بہت سے سفید پوش لوگوں کی مالی معاونت بھی بند ہو جاتی ہے. مجھے یہاں پر اپنی وہ پچھلی بلاگ یاد آگئی جس میں میں نے ایک عرب قبیلے کے سردار کا تذکرہ کیا تھا. جسے بظاہر ایک مجبور نظر آنے والے شخص نے ڈاکو بن کر لوٹ لیا تھا. ہمارے معاشرے میں بھی کئی ایسے افراد موجود ہیں جو اپنی مظلومیت دکھا کر ناجائز پیسہ لوٹ لیتے ہیں حالانکہ وہ حقیقی مستحق نہیں ہوتے. اسی وجہ سے پھر انہیں پکڑنے کے لیے اصول و ضوابط بنانے پڑتے ہیں.

گداگری کا فروغ:

گداگری ایسی لت ہے کہ ایک دفعہ جسے لگ جائے پھر وہ ساری زندگی محنت مزدوری سے قطع تعلق ہو کر صرف مانگ کر کھاتا ہے. بعض لوگوں نے تو اسے باقاعدہ پیشے کے طور پر اختیار کر رکھا ہے. ایک عام گداگر دن میں 5 سے 6 ہزار بآسانی جمع کر لیتا ہے. لوگوں کی نظر میں تو وہ بے گھر اور مجبور ہوتا ہے اس لیے لوگ اس پر ترس کھا کر اس کی بڑھ چڑھ کر امداد کرنے کی کوشش کرتے ہیں. آپ نے شاید سنا ہو کہ انڈیا میں ایک بھکاری کے گھر پر جب آگ لگی تو لوگ یہ دیکھ کر حیران رہ گئے کہ بھکاری کی جھونپڑی سے لاکھوں کروڑوں روپے برآمد ہوئے جو جل کر خاکستر ہو گئے. مال کمانے کی ہوس ایسی عادت ہے جو وقت کے ساتھ ساتھ بڑھتی چلی جاتی ہے. حرام مال کھانے والوں کو ایسی عادت ہو جاتی ہے کہ وہ چاہ کر بھی پھر رک نہیں پاتے اور کوشش کرتے ہیں کہ جہاں سے ملے جیسا ملے چاہے جھوٹ بولنا پڑے، کسی بھی قسم کی اخلاقی برائی کا ارتکاب کرنا پڑے وہ کر گزرتے ہیں. تو اس لحاظ سے فلاحی تنظیموں کی خیراتی سرگرمیوں یعنی فنڈنگ اور ڈونیشن پر ایسے بھکاریوں کی خصوصی نظر ہوتی ہے اور وہ کوئی موقع ہاتھ سے جانے نہیں دیتے، جس کے نتیجے میں محنت مشقت کرنے والوں کی تعداد گگٹ رہی ہے اور گداگری آہستہ آہستہ بڑھتی ہی چلی جا رہی ہے.

ضرورت اصلاح:

ضرورت اس امر کی ہے کہ اگر ہم کسی مستحق کو مال دینا چاہیں تو پہلے اس کی تحقیق کر لیں کہ آیا واقعی یہ مستحق بھی ہے یا نہیں؟ اور دوسری بات یہ کہ اگر آپ واقعی کسی غریب کی امداد کرنا چاہتے ہیں تو بجائے اسے دو چار روپے دے کر احسان جتلانے کے اسے مستقل بنیادوں پر روزگار مہیا کر دیجیے. جو حالات کے ہاتھوں مجبور ہوجاتا ہے، وہ اپنے لیے اپنے پیاروں کے لیے کسی قسم کی محنت مشقت کرنے سے نہیں کتراتا. کسی کی عارضی مدد کر دینا بھی اسے خوشی دے سکتا ہے مگر کسی کو اپنے پیروں پر کھڑا کر دینا، اسے مستقل بنیادوں پر روزگار دے دینا، اسے خود کفیل بنا دینا، یہ زیادہ بہتر ہے کہ وہ اور اس کا خاندان زندگی بھر کے لیے کسی کے آسرے کا انتظار کریں. میں سب خرچ کرنے والوں سے یہی استدعا کرتا ہوں کہ آپ اگر کسی کی مدد کرنا چاہتے ہیں تو اسے حلال طریقے سے کمانا سکھائیں. تاکہ اسے زندگی بھر کے لیے کسی سے مانگنے کی حاجت محسوس نہ ہو. دراصل یہی حقیقی امداد ہے.