The Impact of Parental Misconduct on Children's Upbringing | والدین کی ناچاقی کا بچوں کی تربیت پر اثر

ہم نے معاشرے میں اکثر یہ دیکھا ہے کہ اگر بچے کہیں پر غلطی کرتے ہیں تو فوراً یہ کہہ دیا جاتا ہے کہ والدین نے تربیت ٹھیک نہیں کی. میرا یہ ماننا ہے کہ دنیا میں کوئی ماں باپ بھی یہ نہیں چاہتا کہ اس کی اولاد بگڑ جائے یا وہ اس کی بدنامی کا باعث بنے. شاید ہی ایسے کوئی ماں باپ ہوں جنہیں اپنی اولاد کی برائیوں اور عیبوں پر فخر محسوس ہوتا ہو. پھر یہ سوال اٹھتا ہے کہ آخر والدین کی جانب سے تعلیم و تربیت، نصیحت اور لاکھ کوششوں کے باوجود بھی ان کے بچوں میں بری عادات کیسے منتقل ہو جاتی ہیں؟ کیوں بچے بڑے ہو کر بری عادات اور رویوں کو اختیار کر لیتے ہیں؟ آخر کیا وجہ ہے؟ کیا معاشرہ ان کی تربیت پر اثر انداز ہو جاتا ہے یا پھر والدین سے ہی جانے انجانے میں ایسی چھوٹی چھوٹی غلطیاں ہو جاتی ہیں جن کا خمیازہ مستقبل میں بہت بڑا بھگتنا پڑتا ہے اور بچے والدین کی عدم توجہی کے باعث دماغی طور پر رفتہ رفتہ مفلوج ہوتے جا رہے ہیں.

میرا نقطہ نظر:

جیسے کہ میں اپنا نقطہ نظر پہلے ہی واضح کر چکا ہوں کہ کوئی باپ نہیں چاہتا کہ اس کی اولاد آوارہ ہو کوئی ماں نہیں چاہتی کہ اس کی اولاد نافرمان ہو، مگر کچھ باتیں جانے انجانے میں والدین سے ہی ایسی صادر ہو جاتی ہیں جو آگے جا کر بچوں کی تربیت پر منفی بور پر اثر انداز ہوتی ہیں. مانا کہ معاشرے کا، دوستوں کی صحبت کا، سکول کالج اور یونیورسٹی کے ماحول کا، اردگرد رہنے والے لوگوں کے رویوں کا اثر بھی کسی نہ کسی حد تک بچے کی تربیت پر پڑتا ہے لیکن اگر انسان کی اولین درسگاہ یعنی ماں کی گود سے ہی اس کی تربیت صحیح بنیادوں پر استوار ہو جائے تو معاشرے کے گرم سرد سے اسے فرق نہیں پڑتا. اگر والدین کی تربیت مضبوط اور مستحکم ہو تو پھر چاہے بچہ کیسے ہی ماحول میں چلا جائے وہ اپنی اقدار پر ہرگز سمجھوتہ نہیں کرتا. اگر کوئی بچہ بظاہر اچھے گھرانے سے تعلق رکھتا ہے، ظاہری طور پر اس گھرانے کا تذکرہ اچھے الفاظ میں کیا جاتا ہے. مگر آپ دیکھتے ہیں کہ شریف گھرانے سے تعلق رکھنے کے باوجود اس کے طور طریقے درست نہیں ہیں تو کہیں نہ کہیں ان وجوہات میں سے کوئی وجہ پائی گئی ہوگی جس کا تذکرہ میں آگے کرنے جا رہا ہوں.

باہمی ناچاقی:

والدین کی آپسی لڑائی اور نااتفاقی کا منفی اثر ضرور ان کے بچوں پر پڑتا ہے. جب بچہ یہ دیکھتا ہے کہ والدین مجھے تو لڑنے جھگڑنے سے منع کرتے ہیں مگر خود آپس میں صبح شام دن رات لڑتے رہتے ہیں تو وہ ان کی نصیحت کو بے معنی خیال کرتا ہے. ہم نے اکثر دیکھا ہے کہ والدین جب آپس میں تو تو میں میں کرتے ہیں، بچہ انہیں دروازے کی اوٹ کے پیچھے سے چھپ کر دیکھ رہا ہوتا ہے. وہ دل میں یہ تمنا کرتا ہے کہ کاش میرے والدین جھگڑا نہ کریں. اس کے دل میں اس لڑائی جھگڑے کی وجہ سے ایک خوف بیٹھ جاتا ہے جس کی وجہ سے وہ اپنی خود اعتمادی کھو دیتا ہے. دوسری جانب اس تکرار کے نتیجے میں جو وقت بچے کی تربیت پر صرف ہونا تھا وہ بھی برباد ہو جاتا ہے. ظاہر سی بات ہے جب والدین کو لڑائی جھگڑے سے ہی فرصت نہ ملے گی تو وہ اولاد کی تربیت خاک کریں گے؟ نتیجہ یہ نکلتا ہے کہ ماں باپ لڑائی کی ساری بھڑاس بچے پر نکالتے ہیں اور پھر بچہ اپنے بہن بھائیوں پر یا جس پر اس کا بس چلتا ہو اس پر اپنے دل کی بھڑاس اور غصہ نکالتا ہے اور ایک تسلسل کے ساتھ یہ منفی رویہ بچوں میں غیر محسوس انداز میں سرایت کرتا جاتا ہے.

گالم گلوچ:

بچوں کی تربیت پر منفی اثر انداز ہونے والی ایک بڑی چیز اس کے والدین کے غیر اخلاقی الفاظ ہوتے ہیں جو وہ غصے میں یا بے دھیانی میں بچوں کے سامنے کہہ جاتے ہیں. اکثر یہ دیکھا گیا ہے کہ والدین کا جھگڑا ہوا. انہوں نے جذبات میں آکر کچھ کہہ دیا. اب بچہ بھی باہر جا کر وہی کچھ دوسروں سے کہہ رہا ہے اور بچوں کی شکایت جب والدین تک پہنچتی ہے کہ آپ کا بچہ گالیاں دے رہا ہے، تو پھر اس کی دہری شامت آجاتی ہے، حالانکہ یہ گالی اسے والدین نے ہی سکھائی ہوتی ہے. کہتے ہیں کہ تیر کا زخم تو بھر جاتا ہے مگر زبان سے لگا زخم کبھی نہیں بھرتا. ہاتھا پائی تو چند منٹ میں ختم ہو جاتی ہے مگر زہر میں بجھے الفاظ سالوں تک رنجشیں، کینہ، بغض اور عداوت کو جنم دیتے ہیں. اس لیے والدین کو کسی بھی صورت میں گالم گلوچ والی زبان نہیں استعمال نہیں چاہیے. خصوصاً بچوں کے سامنے تو بالکل بھی نہیں. کیونکہ اگر والدین گالیاں دیں گے تو بچہ بھی یہی سیکھے گا اور باہر جا کر گالیاں نکالے گا.

جھوٹ:

اکثر والدین بے خیالی میں بھی اور جانتے بوجھتے بھی بچوں کے سامنے جھوٹ بول رہے ہوتے ہیں. جب بچہ اپنے بڑوں کو جھوٹ بولتا دیکھتا ہے تو وہ اسے ہلکی سی بات سمجھتا ہے اور زیادہ پرواہ نہیں کرتا. حالانکہ اس جھوٹ کی خرابیاں اس قدر زیادہ ہیں کہ ہزاروں صفحات بھی کم پڑ جائیں. سارے فتنہ فساد کی جڑ ہی جھوٹ ہے. پھر ایک جھوٹ کو چھپانے کے لیے سو جھوٹ مزید بولنے پڑتے ہیں. فقط خود کو صحیح ثابت کرنے یا اپنی غلطی کو چھپانے کے لیے والدین معمولی سمجھ کر جھوٹ بولتے ہیں، لیکن بچہ ہر قسم کی مصلحت سے ماوراء ہو کر دھڑلے سے جھوٹ بولنے لگتا ہے. جس کی وجہ سے وہ خود اپنا بھی نقصان کر بیٹھتا ہے اور بسا اوقات والدین کو بھی شدید نقصان سے دوچار کرتا ہے. اس لیے والدین کو کبھی بھی خصوصاً بچے کے سامنے کسی صورت بھی جھوٹ نہیں کہنا چاہیے. ورنہ کل کو بچہ بھی یہی سیکھے گا.

رشتہ داروں سے عدم رواداری:

بسا اوقات دو خاندانوں میں عرصے سے باپ دادا کے زمانے سے لڑائی چلتی آ رہی ہوتی ہے. دیہی علاقوں میں تو یہ لڑائی صدیوں تک چلتی رہتی ہے. چھوٹی سی بات پر ہفتوں مہینوں بلکہ سالوں تک ناراضگی چلتی رہتی ہے. بچے تو آخر بچے ہوتے ہیں. انہیں کیا معلوم کہ کس رشتہ دار سے ماں باپ کی قطع تعلقی چل رہی ہے. جب دونوں خاندانوں کے بچے آپس میں مل جل کر کھیلتے ہیں تو والدین کو یہ بات ایک آنکھ ہضم نہیں ہوتی اور پھر وہ بچوں کو زبردستی ایک دوسرے سے جدا کرنے کی کوشش کرتے ہیں. ہمارا مذہب تو رشتہ داروں سے قطع تعلقی کو حرام بتاتا ہے مگر افسوس کے ساتھ ہم اپنی جھوٹی انا کو مذہب پر بھی فوقیت دے جاتے ہیں. یوں تو اور بھی کئی وجوہات اور اسباب ہیں، جہاں والدین سے کمی کوتاہی رہ جاتی ہے مگر مضمون کی طوالت کو مد نظر رکھتے ہوئے میں اسی پر اکتفا کروں گا.

آخری گزارش:

بچے ادب و احترام بھی والدین سے ہی سیکھتے ہیں اور بداخلاقی بھی. خدارا. بچوں کی تربیت کی خاطر خود کی بھی لازمی تربیت کیجیے. کہیں ایسا نہ ہو کہ کل کو آپ کی بری عادات اور رویوں کا خمیازہ معاشرے کو آپ کے بچوں کی صورت میں بھگتنا پڑ جائے. گھر کے ماحول کو پرسکون بنائیں. ہر وقت کے لڑائی جھگڑے سے گھر کا ماحول خراب ہوتا ہے. سکون برباد ہو جاتا ہے اور بچے رفتہ رفتہ ذہبی مریض بن جاتے ہیں. آپ اپنے بچوں سے سچی محبت کا ثبوت دیتے ہوئے انہیں ذہنی مریض بننے سے بچائیں. ان کی صحت مند ماحول میں تربیت کریں تاکہ وہ ملک و ملت اور معاشرے کے لیے فائدہ مند ثابت ہو سکیں.