Some People Only Love You When You’re Useful

Hmm… this life ehn, sometimes you go think say people love you for who you be, not knowing say na what you fit give dem make dem dey smile around you. I learn this one the hard way, and honestly, it pain me small but also open my eyes.

I remember one time some years back, I was doing well small small. I just get one good paying job, I dey always get alert steady. That period, my phone no dey rest. Calls everywhere, “Bro how far?” “You too quiet these days.” “Abeg I wan see you.” I felt loved, I felt important. If I enter any gathering, everybody go hail me, “Chairman! My boss!” I even think say that was the way friendship suppose be love, gist, laughter, everything sweet.

But one day life just twist. I lost that job. Things come bend small, even my small savings finish fast. Then I begin notice say my phone quiet. The same people wey dey always dey around me suddenly no get my time again. Messages no dey come, calls stop. Even when I reach out, dem go reply like say dem busy. That was when I realize say some people no really love you dem just love what you bring to table.

It hurt o. I remember one close friend I help that year, when e get problem, I lend am money. I no even collect back. But when I call am later for small help, he say, “Guy you know that things are hard.” That night I no sleep. I just dey reason how quick people forget good when the benefits stop.

That whole experience teach me one important lesson value yourself even when you no get anything to offer. Some people go only love your usefulness, not your person. But true love or friendship no suppose work like that. Real people dey stand by you whether you dey up or down, rich or broke.

Now, I no carry any bitterness. I just learn to watch people carefully. I no expect much again, I just dey thankful for the few wey still stay with me even when I get nothing. Life na teacher, and e no go ever stop to show you who really care and who just dey wait for your shine.