Natapos na ang buwan ng Pebrero at harinawa'y lahat ay naging masaya at payapa. Bagong linggo na naman kaya't atin nang simulan ang patimpalak sa wikang Tagalog.

Mas marami na ang sumali sa ating patimpalak at nagpasiya na makilahok muli kaya't ako ay nagagalak sa mga ganap.

Maliban doon ay nagkaroon tayo ng sponsor sa patimpalak mula sa isang anonymous na donor. ( Wag nyo na silipin ang wallet) Napag-usapan namin na ang 20 Hive ay hahatiin sa apat na linggo kaya't sa makatuwid makakatipid ako ng 20 Hive ngayong buwan! HAHAHA. Kung gusto nyo rin mag sponsor ay maari din naman.

Dahil sa nalalapit na modernisasyon ng dyipni naisipan ko na gawing prompts ang mga sumusunod.

Papasok o Hindi?

Noong ako ay nasa Maynila, kahit na mayroong strike ang mga dyipni ay palagi parin kaming pinapapasok sa opisina. Dahil narin kami ay tinatawag na imortal noon ay wala kaming choice kung hindi ang pumasok. Ngayon, ikaw sa napipintong strike ng mga pampublikong sasakyan papasok ka pa ba? Kung ikaw ay papasok, ano sa tingin mo ang iyong magiging mga sagabal? Kung hindi naman, paano mo palilipasin ang araw?

Kwentong Dyipni

Halos lahat tayo ay nakaranas na ng sabaw-moments sa ating pagba byahe. Nariyan ang mali-maling pagsabi ng para, pag-abot ng sukli atbp na hindi ko na papahabain pa dahil baka iyan ang iyong napili. Ano ang iyong hindi makakalimutan na sabaw-moment sa dyip?

Taas Pasahe

Sinasabi nang mga tsuper na hindi nadaw sila kumikita sa pamasahe na ating ibinabayad. Ikaw ay nabigyan ng kakayahan upang pairalin ang taas pasahe sa pampublikong sasakyan. Magkano sa tingin mo ang nararapat na dagdag sa ating ibabayad. Ipaliwanag at gumamit ng pormula kung sakali man.

Mangyari lamang na ipost ang iyong akda sa TagalogTrail na komunidad para mapasama sa aking pagpipilian.

Mga alintuntunin

• Gamitin ang #Tagalogtrail sa unang tag.
• Ipost sa TagalogTrail na komunidad
• Gumamit ng mga larawan na copyrights free at ilagay ang link kung saan nakuha ang larawan. Kung ito ay iyong kuha, mangyari lamang na isaad na ang iyong larawan ay mula sa iyong selepono o kung ano mang kagamitan.
• Maari ang Tag-lish o kaya naman ay Bilingual na post (para magkaroon parin ng pagkakataon na ma curate ng ibang lahi.
• 250 salita o higit pa. Hindi kasama ang mga palabok na wika gaya o paunang mga remarks.
• Maaring mula sa imahinasyon ang iyong akda pero mas malaki ang puntos kung ito ay personal.

Premyo

Ang patimpalak ay magtatapos sa Sabado ganap na 12:00 ng madaling araw. Sa lahat ng sasali maraming salamat at mabuhay tayong lahat!