https://lihkg.com/thread/965513/page/1
this good
好長好長，但希望中意廣東歌嘅你會花2分鐘睇一睇
有人可能會屌各大分獎典禮，例如古天樂拎獎。
但我聽完今年樂壇好多歌手同作品，至少我覺得廣東歌係掂！ 有人會話旋律單調，有人話不及以前，但我至少睇到香港仲有好多人係有心做好廣東歌。
甚至我覺得今年嘅樂壇好嘅作品好多，可能只係果份努力冇俾人留意到。
樂隊：rubberband,supper 呢d樂隊今年做d歌有冇心相信大家有眼見，果個捍衛樂壇嘅心。其實仲有kolor 呢類高質band,只係佢地堅持做自己想做嘅野。利申：好想《未來見》贏
男歌手：軒仔，Jason, Eason 、Juno,腎仔，牙醫甚至比比鳥都仲keep住俾力香港香壇。今年特別想讚下牙醫，佢雖然被硬cut,但佢今年嘅努力唔應該俾佢嘅出身抹殺 I mean 超巨。
女歌手：kay 小明 小巧 aga ginlee 等等又係講唔曬。 特別再講下gin lee,唔係香港人都堅持廣東歌，作品首首有質素，見到有唔係香港人都咁中意廣東歌就係好感動。
詞曲：詞方面：有好多好詞同有心嘅詞人，夕爺 wyman 周耀輝，林若0，甚至大家都鬧嘅謙仔。呢度想講一講佢，佢d詞嘅水準的確係未必比得上以上提及嘅前輩，好多人屌佢淨係量多，但係我覺得呢個人對香港樂壇仲係有心，唔中意廣東歌嘅話係唔會寫咁多嘅詞。廣東話9聲大家都知幾難填，同埋佢都有d詞係中上甚至係幾好，例如我自己就好中意家書、給兒子的信呢d。 利申非打手 同埋仲有好多歌手同唔出名嘅人都寫到好詞，今年6號寫左 《停半分鐘聽一闋歌 》俾牙醫，我自己覺得903最大遺珠係呢首歌，詞曲都好好，中意廣東歌真係要聽聽，利申聽到眼濕濕。仲有唱作人呢，例如林亦匡。
曲：呢方面我唔太熟音樂，但我覺得廣東歌嘅曲係有種好特別嘅味道，有人會屌一成不變、單調，但好易記都上口配合埋熟悉嘅歌詞。例如讚下曲壇新貴cousin Fung. 講求變，aga同埋有d再小眾d嘅唱作人嘅曲都一直尋求嘅突破，例如今年aga嘅《小問題》 。
其實好多嘢都係選擇，好多嘢你冇選擇到用心去聽去搵去支持，唔代表果樣嘢唔存在或者已死。可能現在人選擇太多，忽略咗好多嘢。好多人中意跟風，人屌我屌，睇幾隻字聽某幾首歌就去斷定一d嘢。
依家嘅樂壇未必個個唱歌都去到Eason 學友咁穩定嘅live水準，但有心嘅人仲係好多好多，好多人仲想做好廣東歌。只係在乎聽眾去唔去欣賞。更有一群有心人純喜歡廣東歌or音樂，直程唔需要討好聽眾，未必渴望成名。我唔係話以前嘅廣東歌唔好，只係近年嘅廣東歌值得更多嘅留意同欣賞。
呢個post唔係想引戰，只係純粹抒發己見，同埋想中大家講...... 我真係好中意廣東歌!!!特別係今年睇到好多音樂人嘅努力。樂壇嘅興衰其實都關我地呢d聽眾事。
Sorry for 1999 但感謝睇到呢度嘅你。
你愈中意同在乎嘅嘢，你就會花愈多嘅心機。
我好希望大家睇完會留言，因為想更多人睇到個post,特別希望大家留言嘅同時，會留埋幾首大家好中意嘅廣東歌名/歌手/歌詞。
再一次多謝中意廣東歌嘅你地！
一個中意廣東歌嘅文字人上