الواحد كبير و ناصج كفاية أنه يبقى عارف ان كل العلاقات الإنسانية مهما كانت درجتها مسيرها تقل .. يقل الترابط فيها .. بموت أو سفر أو انفصال أو طلاق أو وجود حتى بدائل .. فاهم وعارف و مدرك دة
بس فى الحقيقة عدم استعداداك و المفاجأة بيبقى ليها عامل كبير .. و نضجك هنا ملهوش وزن فى المعادلة دى
كنت فاكر هيبقى في تجاوز للتعلق !
انا اتأذيت جدا وما زلت متعلق
مفيش تجاوز، ميت ميت، ما دام المشاعر كانت حقيقية، عرفت انى هكمل حياتى مسخ، فاقد التذوق، الخيبة واكلانى، الحزن مش هيسيبى اضحك، والذكرى هتطاردنى حتى قبل النوم، كل الأيام هتبقى شبه بعض
صدقينى مفيش تجاوز
كلها مسكنات .. كلها حاجات لحظية و مؤقتة
فى كل الحالات هفقد جزء من روحى جزء انا مش هختاره ، هخسر فى كل الاحوال و للاسف خسارتى هتأثر على كل علاقاتى ، و بعد كده هتأثر فى الخوف من العلاقات نفسها هتأثر لما الاقى علامات معينه تظهر عليا تخلينى اخاف من الناس و هتأثر فى كل العلاقات بينى وبين البشر و للاسف فى كل الحاجات مفيش خروج سلمى من غير خساير مفيش فقد بنخرج منه سُلام
فى كل الحالات هخسر
و حتى لو وصلنا لمرحله من التجاوز كنوع من أنواع المكافأة الى بتديهالنا الحياة .. فمع اى ذكر للموضوع هنتوجع !
مش كل الجروح بتتحول مع الوقت لندوب زى ما بنسمع ، بعض الجروح بتكون اعمق بدرجه بتخلى الجرح بينزف بالبطيء قوى .. لحد ما يستنزفنا تماما و نتحول لمجرد زومبى عايش فى روتين وخلاص مجرد عايش ع المسكنات .. خروج وسفر وصور ولبس جديد و اكل و جيم حضور افراح .. شغل .. كلها ملهيات .. كلها مسكنات .. مسكنات بينتهى مفعولها اول تنتهى من الى بتعمله.. اول ما يجى الليل .. اول ما ترجع من السفر .. اول ما تشوف حلم أو كابوس لتفاصيل صغيرة كانت بتحصل ليكم مع بعض ..
فى الحقيقة معرفش بقول دة ليه
بس اهو بنقول وخلاص
على الأقل علشان بعد ما يمر وقت .. مقعدش ألوم نفسى إن حتى الكلام الى هو اققل حاجة ينفع اعملها ... تكون نتيجته انى كتمته انى مقلتهوش .. انى سكتت وقت ما كنت محتاج اتكلم
.. دى فضفضة وخلاص