Malam Lailatulqadar

Aneuk mit ubeut phon geu peu tah teh
Mangat jeut saheh langkah beu teuga
Deungon Bismillah ruah lon careh
Baca beubereh buhu yang lon ba

Lailatulqadar malam yang leubeh
Malam geupreh-preh wahe syedara
Siribee malam beda teuku syeh
Cukop that leubeh malam mulia

Aneuk jok sirup jampu meulisan
Peuget makanan buka puasa
Buhu lon ganto jinoe hai rakan
Uram mate an ujong matee a

Lailatulqadar malam yang rahman
Leubeh get bandengan siribee beda
Malam Allah bree tanyoe ampunan
So manteng rakan yg tem taqwa

Hana geukalon kaya ngon tampan
Ampunan Tuhan dak gasin papa
Malam yang leubeh beuleun ramadhan
Geu peutren Alquran malam mulia

Mandum makhluk nibak malam nyan
Sujud keu Tuhan Allah taala
Bak kayee sujud peuneujeut Tuhan
Lam hadist rakan meunan calitra

Beureukat rizki seulamat iman
Meunyoe malam nyan pujoe rabbana
Punoh ngon rahmat deungon ampunan
Keumandum insan yg tem meudoa

Semoga tanyoe beusampo rakan
Rahmat malamnyan geutanyoe rasa
Taat ibadah taseumah Tuhan
Seubab malam nyan Allah rahsia

Dalam sibuleun beuleun Ramadhan
Tapeugleh badan tapeugleh dosa
Semoga tanyoe roh dalam golongan
Seulamat iman akhirat donya

Etno keuh panton susom karangan
Jeut keupedoman geutanyoe dumna
Walau si kata geuyu sampaikan
But keubajikan meuteumeng fahla

Ahadipj, 22 Mei 2018