My people, how una matter be?
My Bros gist me this story one day like that and till now, I still de laugh anytime I remember am.
This one na correct warri gist.
My bros na student for one boarding school like that for Ughelli and e get one boy weh thin well well so tay them give am guy name "Tinygboko". Just say because the guy thin, my brother and e friends just de maltreat the guy anyhow. Every time them go collect e sandine but Tinygboko just package.
So one day, my friend Edafe just waka come meet Tinygboko, collect e sandine
Tinygboko: Edafe give me my sardine na
Edafe: if I no give you wetin go happen?
Tinygboko: wetin you want make i chop now weh you collect my Sardine?
Edafe: you still de talk? I go woze you slap oh, u de mad?
Tinygboko: You go slap me? Edafe
Before we know Edafe just give Tinygboko one hot slap, I sure say that slap blow Siren for Tinygboko ear.
Tinygboko: Edafe you slap me? (Edafe just waka leave am)
For my Sardine again?
Na so we think say matter don die oh, we think say Edafe win again but the matter no die oh my people, something happen that night.
Tinygboko just wait make everybody sleep, nai the guy fetch 5 buckets of water, line am up for Edafe coner, e just discharge the junior students there. The next thing go surprise you, Tinygboko pure Edafe 1 bucket of water first through e mosquito net, on top bed as e de sleep.
Tinygboko: Edafe, na Thinygboko oh come out
Edafe: Jeeesus Jesus oh, Holyghost fire...
Tinygboko: ( Pour am the second water) Edafe, na me oh, Na me Tinygboko, come out
Edafe: Abeg na, pity me. How I wan take know say na Tinygboko?
Tinygboko: ( Just pour am the 3rd bucket) Edafe come out, na me Thinygboko
Because of fear Edafe no gree come out, maybe e think say na dream e dey dream.
Na so Tinygboko pure Edafe the remaining water, fear no let Edafe come out because e think say witch come attack am that night. Edafe sleep for wet bed till day break. As day break, people weh wake up when the thing dey happen just de talk the matter, Edafe the rugged trouble maker just cool like icewater, since then everybody come de respect Tinygboko because e fit be their own turn this time.
If Person thin abeg my people make una no take that person play.
I hope say una enjoy the story.
Thank you.