THE CREED OF LIFE (my NPC entry for Episode 3)

My pipol, Hive account@uniquegem don land again o. As i come see this ogbenge challenge wey our boss lady Hive account@ogoowinner come cook for us again o, i talk say i must join o.

Me i believe say all man get right to be heard, seen and loved.
I still come believe say all man for this life dey equal.
Me still believe say this world wey we come live in, dey big enough to carry every man.
I still come believe say every man get talent wey baba God use bless am for em own area of life.

I believe say all man dey special and unique for this life.
I still come believe say all man get angel and beast wey dey inside them, but me as cool boy wey i be go try to calm the beast come wake up the angel.

I go treat people as i wan make them treat me.
For this life i no go underate person based on say em no get anything or em no reach my class, instead i go try make am become person.
I no go join business wey go dey harmful to pipol.

I believe say all race, religion and social status be nothing but the creation of contentious men wey dey come dey control others, come dey cause strife and in-plant the supremacy mentality. So me don choose say i go be "human first" before i go be of any race, religion or class.

I go try hard to dey understand pipol well well, so i no go dey misjudge pipol.
I no go ever allow envy, jealousy and greed control me.
I go everly try my possible best to do something for humanity, wey all man no go ever forget even if i no dey this world again.

I no go ever allow make fear intimidate me for this life.
I no go ever free myself for were negative thoughts dey, i go always over power am with righteous thoughts wey go impact for pipol life.

I go always be me, my original self, i no go ever photocopy persin.
I go always try to dey think positive for any given task wey i get, so i go come out with positive results.
Me believe say life na journey no be race, so i no go allow myself to come dey compete with pipol.
As i dey now;
I beleive say all man get right to be loved, seen and heard.
Me come believe in peace.

Me come believe in charity.

Me come believe in forgiveness.

Me come believe in love.

I believe in mercy.

I believe in human race.

Me don make decision to live and to live and to live again.
I, Hive account@uniquegem will abide by this creed all the days of my life.

Make i stop here. I wan use this medium thank eveybody wey come read my post well well and i wan thank our forever boss lady Hive account@ogoowinner for her kind heart, madam i hail o.