IE KUPI

Bukon le sayang cicem merpati
Ateuh bak giri ka busu takat
Assalamualaikum lon peuphon rawi
Keu bhah ie kupi keuno lon intat

Aceh nyo meugah dum warong kupi
Aci peurati rata jeut teumpat
Lapan ploh persen hasil peneliti
Nyo keude kupi haek ta ingat

Nyo ureung ka candu paloe han sakri
Meuseu tan kupi jadeh meukarat
Dumpeu keurija beuna ie kupi
Supaya bek seu i wahe e sahbat

Lam lampoh raya ureung meutani
Geu pula campli deungon bak tomat
Uroe ngen malam bak keude kupi
Lalee ngen fb ladom balah chat

Dipidie jaya na adee kak ti
Neublo hay akhi nyo na neulewat
Peulom rata cafe kana waifi
Dum muda mudi keunan meusapat

Bak rumoh pesta gura lom dali
Hana pree kupi ta eu siat at
Ureung cang boh panah haba geurawi
Lam glah ie kupi laju geu takat

Adak takalen peujabat tinggi
Tetap ie kupi geujep hay bg syat
Haba politek teukhem meu hihi
Lam kide kupi geupeuget rapat

Aneuk meureubok dipoe meuriti
Ateuh bak jati dipiyoh siat
Bek sampe lale bak keude kupi
Keu tuhan rabbi hana ta ingat

Seubab nyo mate singoh teukeudi
Hantrouh ta kali tanyo meularat
Masa di donya lale jep kupi
Keu tuhan rabbi hana ta ingat

Meubek le panyang canang lon rawi
Keu bhah ikupi ulon peu tamat
Meunyo na salah meuah beuneubi
Yang bek neu caci beuneupeu ingat