Rhoh masa ubeut tanyo ta tak teh
Langkah ta aleh sibanja banja
Assalamualaikum ulon peu saheh
Keu bhah teuraweh keuneuk meurika

Riyeuk di laot jipoe u bineh
Sinyak kup rimeh bineh kuala
Puasa ramadhan beuleun teuleubeh
Tanyo beu bereh Pujoe rabbana

Sideh dimatang meugah satee tumeh
Kuwah kreung mameh peuget le miwa
Lheuh tapuasa beuna teuraweh
Beuna lom tasbeh oh malam jula

Kampus unsyiah di banda aceh
Cukop bereh2 dum mahasiswa
Meu macam2 ureung teuraweh
Neudeungo bg syeh ulon calitra

Dipidie jaya na jalan layang
Ramee disinan oh watee sinja
Buhu lon ganto dari eh keu an
Mangat get timang haba meurika

Bukon le sayang ta eu bak Mamplam
Kapatah hay bang buet angen raya
Ladom beuo ureung Sembahyang
Nyo ayat panyang Tgk imum geuba

Na cit yang ladom wate Sembahyang
Ka diklik sigam ube be raya
Nacit lon kalon di kak maryam
Lalee di gopnyan bak selvi saja

Aleuh nyan upload bak inseutaleugram
Pamer di gopnyan bak dunya maya
Ancoe pikiran watee tabayang
Aleh pakiban jameun jino ka

Na cit ta eu oh wate buka hay rakan
Geu eu makanan Meu macam rupa
Mandum geupajoh dumpeu ka geu tran
Teuraweh lheuh nyan haek keurija

Oh no keuh dilee Haba karangan
Meubek hay cut bang lagee lon rika
Sembahyang teuraweh beu bereh rakan
Beuleun ramadhan le that fahala

Ahadipj, 19 Mei 2018