Rakan Sinaroh
Assalamu'alaikum saleum lam rampoe
Tanda lon pakoe rakan syedara
Ulon bri saleum mandum beusigoe
Si beurangkaso bandum yang baca..
Bacut lon karang kisah lam rampoe
Teuingat bacut ulon meurika
Rakan sinaroe judul lon pasoe
Meunyoe keu asoe nasehat lon ba..
Peureule parang 'oh koh bak panjoe
Sibok mita goe bak utoh bara
Ingat keu tuhan rakan sinaroe
Dua blah jaroe do'a ta pinta..
'Oh saket badan su'um ngon asoe
Bak tuhan sidroe ta lake teuga
'Oh puleh badan ka mangat asoe
Keu tuhan sidroe teuwoe ngon lupa..
Pajan chiet pajan teu ingat sigoe
'Oh ka meupaloe deungon binasa
Baro teubayang keu tuhan sidroe
Malam ngon uroe taroe ie mata..
Ingat keu tuhan rakan sinaroe
Malam ngon uroe bek sagai lupa
Teumpat singgahan sinoe lam nanggroe
Mandum teuh tawoe u alam baqa..
Beuna amalan keu pangkai tawoe
Ta peu siap droe wate ta gisa
Nyo tan amalan keubit that rugoe
Baro phon tawoe peudeh tarasa..
'Oh noe hai rakan kisah lam rampoe
Bah laen uroe ta sambong haba
Meuah lon tuan nyo salah asoe
Kadang meu gawoe bak tuleh rika..