📝 [PANTON ACEH] #8 : Aneuk-Aneuk Rasul Mustafa

Dengôn Bismillah awai mula phôn
Saleum lôn susôn mandum syedara
Pujô keu Tuhan Ilahi Rabbôn
Yang peujeut dusôn alam semesta..

Nabi Muhammad saleum nibak lôn
Seulaweut sanjông Tuhan peuteuka
Keu waréh Nabi laju lôn susôn
Taulan ngên kawôm yang that mulia..

Nabi geutanyôe na namplôh lhê thôn
Iradah Rabbôn umu mulia
Ceudah that rupa cukóp rupawan
Lon ba tamselan buleun purnama..

Sifeut mulia Allah ilhamkan
Cit hana dendam di dalam dada
Disegan musôh ditakôt lawan
Disayang kawan sanak saudara..

Tujóh drôe aneuk Nabi janjongan
Lhê drôe nibak nyan agam semua
Aneuk phôn Qasim umu dua thôn
Geu panggil Rabbôn bak umu muda..

Abdullah lahé ôh lheuh aneuk phôn
Kehendak Rabbôn aneuk kedua
Di aneuk sayang lahe lam dusôn
Di Mekkah gampông wafeut semula..

Ôh umu Nabi geunap lhêplôh thôn
Zainab si kumtôm lahé u dônya
Thôn lapan hijrah Zainab bungông ôn
Neuwô bak Rabbôn ikôt kakanda..

Zainab sicandén neuwô bak Rabbôn
Di sampéng kawôm lakô tercinta
Seudéh lam hatè rakan lam dusôn
Aneuk janjôngan meninggai dônya..

Permata keu peut Ruqayyah abôn
Istri di kawôm sahbat mulia
Usman bin Affan pô bungông lam ón
Bungông sikuntóm ceudah that rupa..

Wafeut Ruqayyah hai syedara lôn
Bak urôe tahôn prang badar nama
Cukóp that seudéh Allahu Rabbón
Si bungông kuntôm geu-ikôt poma..

Wahé ê sahbat rakan di ulôn
Di Ummu Kalsum aneuk ke lima
Aneuk di Nabi bak istri yang phôn
Ureung yang tulông bantu agama..

Wafeut di cut kak geuwô bak Rabbôn
Di Ummu Kalsum menikah teuma
Usman bin Affan peu jarôe rihôn
Keu Ummu Kalsum istri tercinta..

Hana trép teuma cuma padum thôn
Di Ummu Kalsum ikôt kakanda
Allahu-Rabbi seudéh haté lôn
Cuma tujôh thôn udép bersama..

Fatimah Zahra lheuh nyan lôn susôn
Lahé lam tahôn nam kosong lima
Rupa ceudah that si bungông lam ôn
Ibarat ie mbôn cahya purnama..

Muka berseri si bungông rihôn
Keu Ali langsông peujaróe teuma
Bak nam dua lhê masehi tahôn
Umu pan blah thôn menikah teuma..

Siblah Hijriyah Allahu Rabbón
Bungông si kuntóm ikót ayahda
Cuma nam buleun lam saban tahôn
Geu panggil langsông oleh Rabbana..

Yóh mantông udép si bungông dusôn
Maria kandông Ibrahim nama
Aneuk keu tujóh geubi lé Rabbón
Di aneuk kandóng si ayeum mata..

Allahu Rabbi hancóe haté lón
Teu ingat untông Rasul Mustafa
Lapanblah beuleun umu lam ayón
Ibrahim langsóng meuninggai donya..

Leupah that seudéh di Nabi ulón
Di aneuk kandóng meuninggai donya
Kehendak Tuhan Ilahi Rabbón
Ajai di dikunjung bah umu muda..

Cukôp bah êtnó wahé rakan lón
Rika lón susón meunòe keuh rupa
Di tanyóe udép siat rakan lón
Beu ingat untóng ingat Rabbana..