Bungông dalam Ôn
Salam'alaikum wahee sahabat
Timu ngon barat tuha ngon muda
Lon tuleh rika neubaca siat
Hana meularat mangat that makna..
Seukuntom bungông timoh digampong,
Pageu seulinga pacang that kukoh,
Tunong ngen baroh na aneuk inông,
Sibungong jeumpa han mungken runtoh..
Beungôh geusiram supot peulara
Bek hama cuca bungong dilampoh,
Kawat na geuboh jarak siejeungka,
Harap beujaya mangat bek putoh..
Wate ka mekar si bungoeng jeumpa,
Rame yg suka keunan jipiyoh,
Han jan thoe reu'oh wate ban teuka,
Jipeugah cinta gombal seretoh..
Alahai kumbang pemuda gampong,
Bek tajak cuca bungong dilampoh,
Wate neu ingat dara keulebong ,
Bek tageulawa nyo tapoet hantroh..
Bungong ban timoh umu that muda,
Pantas tajaga bek sampe luroh,
Bah that dilampoh getanyoe suka,
Beu neu tem saba wahe rakan boh..
Menyoe kawate cit kajatah gata,
Beuget tarawat seugolom reuloh,
Teu ingat tubôh wate ban mala,
Male jih raya sahoe hana roh..
Kepeu teuh guna islam teuh raya,
Menyo tan tajaga akidah tasampoh,
Tanaman luroh habeh ji cuca,
Yang leumpah gura mandum jipajoh..
Keu rakan dara bungong lam gampong,
Beutatem jaga bek sampe mala,
Jameun lawetnyo iman ta peukóng,
Bungong dalam ôn tapeumulia.
