بِسْـــــــــــــــــ اللهِ الرَّحْمَنِ الرَّحِيْمِ
Assalamu’alaikom Wahee syeedara
Gampong ngon kuta baroh ngon tunong
Lon keuneuk suson saboh calitra
Bak neubaca sang sang meukeunong
(Asai Gamba)
Kisah lam nanggroe yang that lon cinta
yang katrep masa hudep lam khem-khom
Sabe lam karu hana tom reuda
Jan-jan di kuta kadang di gunong
Teudoh lam pasi meutamah lam desa
Rakyat seungsara hana peue tanyong
Aman di gampong tutong tutong dikuta
Ureueng seumula bak plueng beukah thong
Peue-peue tapubuet jeut keubuet hana
Hate berkata teumakot keunong
‘Oh tam tum beude kuntak seunjata
Plueng ngon meutaga peusiblah nyawong
Kadang bak plueng-plueng jeuet salah sangka
Ka ‘ohnan kada Allah binyawoeng
Meunan keuh nasib rakyat jeulata
Bandum meurana baroh ngon tunong
Nyang pula campli han geujeut jaga
Campli ka raya kaabeh meubungong
Hangeujeutle saweue karu meubura
Campli meukeuba duroh bandum bungong
Nyang pula bawang dalam lampoh lada
Beungoh ngon sinja siram ngon ie mon
‘Oh karu sinan soe peutoe hana
Bawang ka raya bandum habeh nyawong
Nyang jak U Kanto hate pih gondah
Geutakot teuka sweping keunong
Tuwo ba KTP karoh lam bala
Sayang teuh raya teubingong-bingong>
Nyang Keurija bak CV Toke swasta
Nyan pih leupah jra Jak meusom-som
Sabab digobnyan lethat beulanja
Beungoh ngon sinja gob tanyong-tanyong>
Guru ngon Teungku bandua kaseb jra
Sabab beulanja kakureung tamong
Teuma di Teungku beulanja hana
peugeukerija beuna peng tamong
Meujan yum barang meuhai meutaga
Sabab armada hana di jeut tamong
Barang di Medan hana trok u Banda
Jitakot bala Muto jiserang
Hubungan toke Sembako hana
Habeh meurana agam ngon inong
Teuma di rakyat tan putoih asa
Geumita cara jalan bek keunong>
Ban teuka isu laju siap siaga
Biasa teuka bak ureueng inong
Jak borong barang bak keude apaya
Geupeuwoe sigra U rumoh Peutamong
Nyang leupah sayang jiteut rumoh sikula
Mulai kuta trok U dalam gunong
Meuribee murid putoh sikula
Ladom diyub tenda LSM peutamong
Leupah le rugoe ureueng seumula
Kumpoi beulanja geu peubloe umong
Saboh sagoe gle sawit geupula
Geuharap laba minyeuk meuton-ton
Ban karu bacut di bineh rimba
Larangan teuka bek ek u gunong
Sawit ka watee ujong usaha
Rugoe meujuta ureueng po bingong
*Meunan di Aceh sabee calitra
Ka 30 thon ka meuseumong-seumong
Rakyat meupiret bit phet meutaga
Rusak areuta kadang cit nyawong
Trokle bantuan meumacam rupa
Ban saboh donya u Aceh jirhom
Peunoh Blang Bintang peusawat teuka
Rot darat pihna ladom jitamong
Ohnoe dile wahee Erakan lembaran laen tasambong teuma
mungken katalon na yang tinggai bak laen kali tapebetoi teuma
saleum meuturi@aroel1984
