Wahe saudara loen ban sigom Aceh, padum buluen teuk ukue nyoe geutanyoe mandum rakyat Indonesia dan Aceh, akan tatamong bak uroe-uroe nyang ramei ngen musem politik. Meupadum uroe teuk deuh tangieng le baliho, spanduk dan moto-moto nyang nyang meutipek gamba-gamba urueng-urueng jak mita simpati rakyat untuk duek bak kurusi dewan tau geucalon droe sebagoe waki rakyat.
Ramei takalon urueng-urueng nyang cukop meuseumangat neuk duek bak kurusi dewan. Oleh urueng-ureung nyan, enteuk akan geupegah dan geumeujanji bak rakyat, bahwa menye teupileh gopnyan akan amanah geupeujuang keu rakyat. Dan maseng-maseng akan geupeugah droe geuh nyang beutoe, dan cukop cocok keu waki rakyat, hana tuwo geupeusampoe bahsa-bahsa bahwa hana laen menye koen gopnyan yang nyang akan geume perubahan keu mandum rakyat lam nanggroe. “Nyan menye koen buet kamoe han hase, nyang laen pane na,” bahsa lagei nyoe akan troek bak punyueng rakyat mandum.
Sunggoh bahagia menye janji nyang geupeugah nyan akan geupebuet oh gopnyan ka teupileh sebagao anggota dewan yang terhormat enteuk. Tapi cukop tasayang, menye bahsa nyan geupegah sebagoe geumita simpati rakyat mantoeng. Oh ka teupileh sabe-sabe geupike keu pruet droe geuh mantoeng. Rakyat sabe-sabe na dalam rugoe.
Wahe saudara loen ban sigom Aceh, mari geutanyoe timang-timang ngen pikiran nyang gleh dan beucarong, supaya geutanyoe nak roh tapileh calon-calon pemimpin geutanyoe nyang beutoe-beutoe geupike keu geutanyoe oh ka geuduek bak kurusi dewan enteuk. Uleh karena nyan uroenyoe jak tacok filsafat bacut bak sifeut SIRA.
Source Image
Uroe nyoe geutanyoe rakyat kajuet tameurunoe bak sifeut SIRA, bek bak sifeut Gincu. SIRA watei tapasoe lam kuah warna ngen bentuk jih hana deuh meubacut pih. Tapi dengan na taboh bacut SIRA, nyum kuah nyan teuresa mangat dan meusaneut. Nyan hana payah loen peugah le makanan menye hana SIRA, ka neu tuoh keudroe neuh kiban nyum makanan hana SIRA?.
Bek neucok sagai sifeut bak GINCU, watei taboh lam makanan, deuh neungieng warna makanan nyan lagak, tapi golom teuntei warna jih lagak watei neupajoh ka tabeui hana nyum SIRA. Lagei geutanyoe hawa kueh jimeukat buluen puasa, oh watei seupot tajak bak urueng meukat kue, tangieng teuk macam warna kueh, oh tangieng warna sang tijoh ie babah. Oh leuh tabloe kueh tapuwou u rumoh ta buka puasa, ban tanjo kueh nyang lagak warna ka tabeui hana rasa, karena urueng peugoet kueh ka tuwo geuboh SIRA. Taneuk pulang kueh, urueng meukat ka guwoe, geutanyoe meukarat tajak seumbahyang taeuraweh, akhe buet pue takheun, “bek tabloe kueh nyang lagak ngen warna, tapi nyum jih hana mangat, tabeui hana jiboh SIRA.
Source Image
Jadi bak contohnyan geutanyoe juet tacok saboh ileumei. Nyang keujuet dumpui makanan menye hana sira, adak lagak misei warna mirah, kuneng, ijo, tetap hana mangat menye lam makanannya hana geuboh meubacut SIRA pih. Meunan chiet bak tapileh pemimpin atau waki rakyat, tapileh pemimpin rakyat atawa waki geutanyoe beulagei sifeut SIRA.
Sifeut SIRA, nyan phon hana peureulee deuh that, adak bak lungkiek dapu SIRA cukop raya manfaat keu rakyat. Nyang kedua SIRA hana peureule pujian yang meulambong, karena SIRA ka le jibi manfaat ke bandum makana. Sidroe pemimpin lageinyan chiet hana peureulee jipujoe-jipujoe, tapi sidroe pemimpin beugeutem pubuet kebajikan kepada rakyat mandum. Legei SIRA nyang ka jibi manfaat makanan mangat, tapi hana pereulee pujian. “Oo ma mangat makanan nyoe, hana geukheun mangat SIRA bak makanan nyoe.” Menan lah ibarat jih.
Mungken lawet nyoe geutanyoe ka salah roh meubloe kueh ngen warna-warni tapi rasa jih ka tebeu. Roh meucok ileumei bak sifeut gincu, geutanyoe pereule ingieng beurayeuk, lagak watei ji kalon. Tapeugah keu manfaat meubacut tan keu rakyat. Nyan ban menye sidroe pemimpin geucok filsafat gincu, kakueh juet keu peuwarna makanan mantoeng, tapi rasa jih hana, tabeui abu, tabeui adoe ee, tabei wahai tungku eee. Kiban ilee makanan hana SIRA. Jadi ukue nyoe mari geutanyoe mandum masyarakat tapileh waki geutanyoe beu lagei sifet SIRA, karena SIRA bak urueng Aceh leubeh le manfaat jih.
Neungieng watei geu piucicap aneuk miet, pasti neupeucicap ngen SIRA koen ngen gincu atau saka, tapi teutap ngen SIRA. Leuhnyan lom watei sidroe-sidroe urueng jipoh, pasti neutanyoeng, “kiban jipoh si jeh pue payah bie ie SIRA ?”. Makna jih ie SIRA lam kehidupan urueng Aceh jeut keu ubat chiet. Leuh nyan lom sereng tadengo lam bahsa Aceh geukheun, “Hai bek le that ka peugah haba beuh, awai loen pajoh SIRA ngen kah”. Leuhnyan lom menye pajoh lincah menye hana SIRA Campli pane mangat.
Jadi SIRA ngen masyarakat Aceh hanjuet tapisahkan, na adat dan istiadat Aceh nyang geupakek SIRA sebagoe permulaan tajalani hudep geutanyoe mandum. Beutoe menye uroe jeh SIRA hana yum, jinoe ka meuhai Yum SIRA ngen SAKA teungku eee. Beu neutupui gara-gara Produksi SIRA di Indonesia kureung, payah Import SIRA dari luwa Nanggroe lagei nyang kaleuh.
SIRA cukop jai manfaat menye ka cair lam ie dan meusaboh ngen sekitar jih. Lageinyan chit geutanyoe lam tarajut kehidupan nyoe, menye hudep geutanyoe ka mencair dan meusaboh ngen mandum lingkungan pat tinggai geutanyoe. Pue mantoeng nyang geutanyoe pubuet harus na dampak jih nyang positif ke umat bandum dan bak tempat geutanyoe tinggai.
Geutanyoe hana pereulee di hormat le gop, harus peurayeuk droe, tapi seulebeh goeut geutanyoe beujuet ta lebur droe teuh lam masyarakat sebagoe urueng nyang geubi manfaat keu mandum urueng ramee nyang meuguna. Lagei SIRA nyang memberi rasa keu mandum makanan.
Urueng- urueng nyang ka geucok filsafat bak sifeut SIRA, ureungnya hana le geupeunteng droe keudroe, hana galak geupaksa keheudak geuh, hana peruelee di peurayeuk, tapi pue mantoeng nyang geupubuet sabe-sabe geupike keu urueng ramee nyang meumanfaat dan jroeh. Jadi bek sagai-sagai neuangap SIRA Remeh, padahai menye hana SIRA mandum hana nyum lagei nyang ka ka.
SALAM KOMUNITAS STEEMIT INDONESIA
Posted from my blog with SteemPress : http://ilyasismail.com/filsafat-sira/