SENAMBONG CEURITA
Indah meusyeuhu si bungong jeumpa
Bungong peunawa mala lam hatee
Meubilah kalbu meujangeun asmara
Lam masa muda peu ayeum hatee
Hatee meubagoe di Muda Seudang
Pikiran meuripang gundah gulana
Teuingat keu haba Aisyah bintang
Payah ba pulang keunari tujoh rupa
Laju geutamong u dalam bilek
Angan meubalek hatee han teunang
Meubileueng gaseue mata meublek-blek
Si bungsu cantek sabe teubayang
Geu eh han teungeut geu duek han simban
Ka lagee boh bhan boco bak peuntee
Pu nyang geu peulaku meucawo hana ban
Han tom na lam dzan barou phoun teupikee
Geu beudoh rijang nyak Muda Seudang
Tueng ie seumbahyang geu peudong malam
Lheueh geu seumayang seulaweuet geu dindang
Hatee geuh teunang tan le meusulam
Ji ku'uek manok tanda ka suboh
Nyak Muda beudoh geupeugo poma
Neubeudoh hai ummi bak watee nyang jroh
Seumbahyang suboh ta jama'ah dua
'Oh ban teuka beungoh ka geujak u blang
Piyoh bak rangkang jep kupi tan saka
Peu nyang mungken pubuet di Muda Seudang
Hana meupantang geu peulaku sigra
'Oh malam uroe rateb han pirang
Geu eh bak ranjang tok siklep saja
Tahajjud han tuwoe nyak Muda Seudang
Doa geu layang bak poe rabbana
Ummi Po Intan pih cukop seumangat
Pubuet ibadat sampoe ka jula
Jaroe geu beu-et doa meuhajat
Hajat meuleukat bak Allah ta'ala
Ka tujoh uroe ka tujoh malam
Nyak Muda agam lagee nyan sabee
Rateb seulaweuet ka tiep-tiep malam
Ismul 'azam geu wirid sabee
Beungoh keu lapan lagee biasa
Geujak keurija peugleih ateueng blang
Beudoh keurija saweueb uroe kha
Geu jep ie saka di ateueh rangkang
Geu duek meujangeuen di cong rangkang blang
Hayal meulayang keu Aisyah bungsu
Watee geu ingat bak malam tunang
Nyak Muda Seudang teuseuheih teusipu
Mata uroe cot leuhou ji tamong
Geu tinggai umong bagah geu gisa
Pruet pih ka deuek ka jiklik lambong
Ta takot beusong touh geuntout saja
MEUSAMBONG
Bek tuwoe neubaca chit ata awai mangat meuho uram ngon ikue;
- Bhah dua blah Nasehat Poma
- Bhah siblah Senue
- Bhah Siploh Keunari Tujoh Rupa
- Bhah sikureueng Syarat Nikah
- Bhah lapan Haba Bahgia
- Bhah tujoh Aneuek Bungsu
- Bhah nam Mula Inti Ceurita
- Bhah limong Masa Abege Dua
- Bhah peuet Masa Abege Sa
- Bhah lhee Muda Lam Ayon
- Bhah dua Awai Phoun Mula
- Bhah sa Muqaddimah