Hikayat Muda Seudang, Pt. 27; Ulang Kisah

SEUNAMBONG CEURITA

Abeih khanduri pakat duek bak anjong
Meutamah untong ngon kupi peudawa
Geuduek geuh ban lhee haba meusayong
Kiban keuh untong cut kak Po Intan

Alhamdulillah pujoe keu Allah
Poma han susah sihat seujahtra
Adak pih ouk geuh ka puteh siblah
Hana meuteugah bak buet keurija

Mulai geu kisah di Muda Seudang
Geurawi sandang ubeena ceurita
Peu phoun ngon judo haba meuriwang
Kiban meuhalang syarat meujeumba

Punoh geu kisah sampoe 'oh dudoe
Ureueng peusampoe bak jrat ayahda
Sambong tujuan geuneuek jak sampoe
Langkah meurantoe nanggroe utara

Di cut ti hayat geudeungo sang lumpoe
Teu ingat parui droe youh muda belia
Alamat kubu hana soe peusampoe
Syukor keuh jinoe ka teuhah rahsia

Apa cut baka ka teuhah babah
Lagee nyoe kisah han tom geudeungo
Tamse keujadian dalam hikayah
Kiban ta peuglah bak meucuet taloe

Allahurabbi nyang poe nyawong lon
Kiban keumuen lon ta seutot keunari
Miseu saboh hi jeut ta theuen taron
Kiban ta labon nyoe tujoh boh hi

Peukeuh hana jeut hajat ta tuka
Ta gantoe guda atawa keubeue dara
Meunyoe jeut leumo bah lon nyang kira
Miseu jeut rusa jeut tajak lam rimba

Adak di lakee meueh limong plouh mayam
Leubeh nibak nyan sanggop lon seudia
Aneuek lon saboh ka lheueh na agam
Hareuta lam reugam hana meuho ba

Hanjeut hai apa cut janji meutuka
Pantang ta langga kada meugantoe
Adak pih brat that syarat meujeumba
Keunari tujoh rupa payah lon puwoe

Han ji tueng rumoh atawa umong
Hana meukeunong ngon meuh sicupa
Hana dilakee meusaboh nyawong
Peu leumo inong atawa guda

Yakin lon tuwan keu hidayah Allah
Akan na arah sampoe bak tujoan
Ulon meulangkah tok ngon bismillah
Hate han susah buet lam lindongan

Meunyoe meunan nyang gata peugah
Hana pat peusiblah payah ta mita
Jinoe tajak eh rhueng ta peureubah
Bah gadoh leulah keubah teunaga

MEUSAMBONG

Bek tuwoe neubaca chit ata awai mangat meuho uram ngon ikue;