Hikayat Muda Seudang, Pt. 29; Lam Perjalanan 2

SEUNAMBONG CEURITA

Boh pukat geucawoe ngon santan kupi
Toh nyang leubeh tari cuba neupeugah
Kuweh pocong chit ka temon ie
Alahai bang pi pruet deuek meuteugah

Sidroe keu sidroe ureueng ji beudoh
Nyang woe u rumoh ladoum meutani
Tinggai nyak Muda nyang goh geubeudoh
Ngon cut bang yunoh nyang meukat kupi

Geujak geupeurhap nyak Muda Seudang
Muka geupandang gauturi hana
Hana tom geukalon meulikak idang
Ureueng peundatang jareung trouh teuka

Alahai agam pat teuka gata
Jareung trouh teuka jamee disinoe
Lon kalon bungkoh sang jioh kuta
Lon kalon guda sang aneuek meuntroe

Han jioh lon beudoh sideh di lamkuta
Ulon neuk sapa bak uboe nanggroe
Hanjeut han ta ba bajee ngon ija
Seunalen raga tuka youh kutoe

Jioh that reucana hai aneuek muda
Teuntee sipeu na hajat that peurelee
Beuleuheun tajak rhot gampong paya
Ban lheueh bencana payah neu gesee

Rhot toh chit ra-ueh ulon jak lanja
Tulong bi haba lon tuho pih hana
Seutot laju bineh ateueng blang raya
Blah wie meubanja pineueng gob pula

Bak ujong ateueng lhee boh bak panjoe
Rhot nan neu peutoe likot meulasah
Bak jalan rayeuk akan trouh sampoe
U barouh ta woe rhot kuta falah

Kru seumangat ka neu tem peugah
Lon beudoh bagah goh leuhou uroe
Geu bayeu idang nyang ka geu tarah
Guda geu papah sambong jak rantoe

MEUSAMBONG

Bek tuwoe neubaca chit ata awai mangat meuho uram ngon ikue;