Hikayat Muda Seudang, Pt. 33; Rumoh Mawa 2

SEUNAMBONG CEURITA

Mirah oun jatoe youh mantong muda
Watee ka tuha oun jih pih durouh
Kisah lam rantoe meubagoe rupa
Kiban nyak Muda sosah meubungkouh

Lheueh geubaca surat di ayahwa ibeunu
Hanjeut le geumeusu ka teuhah babah
Abeih geudeungo dum kisah syahdu
Hantom dum seunue Muda po kisah

Geukeureuleng bacut u ateuh cut ni
Pue jeut ta mulai pajouh bu cot uroe
Takalon nyak Muda sang ka deuk hi
Eunteuk ta keulai haba bak dudoe

Bagah geu anggouk di cut ni mawa
Siat ulon ba talam ngon bakoi
Geubeudoh cut ni ngon aneuek dara
Makanan geutata bek deuh hi pacoi

'Oh trouh u dapu gobnnyan geumusu
Nyan keuh hai meulu seupupu gata
Almarhom Pang Juhang jih nyan abu
Po Intan ibu nyan makcik awak kah dua

Chit ka peukateuen di cut ni mawa
Adak teungoh keurija haba han piyouh
Mulai ban teubleuet dua aneuek mata
Abeih dum haba sanggop geuratouh

Alahai cut bang singkat ta peugah
Bek le ta bahaih pajouh bu teuma
Geujok kama bak Muda eih reubah
Meuphoum geuh rihlah abeih teunaga

MEUSAMBONG

Bek tuwoe neubaca chit ata awai mangat meuho uram ngon ikue;