Hikayat Muda Seudang, Pt.39; Rihoun

SEUNAMBONG CEURITA

Seumeupo si aini keu Aisyah dara
Kiban jeulita ngon soe ta bandeng
Meutilek seubab keu Muda suka
Mungken po dara mahkota kuneng

Hana geu jaweueb le Muda Seudang
Han chit geu pandang ateueh si aini
Meunyoe ta bandeng jioh hai bintang
Han mungken Seudang gepeubandeng hi

Teu iem man dua sampoe trouh u rumoh
Geureubak nyang punoh geupeusoh sigra
Geu jingeuek di mawa di ateueh rumoh
Pakon that runyoh ie muka si dara

Peu beungeih keuh nyo hai aini
Bak takalon hi seudoung meugura
Barou nyan geuyue ka ta peukrout hi
Panee na soe sudi jak lakee gata

Hana hai mak bek peugah meunan
Teungeut hanaban beungoh sep leupi
Jaweueb si aini bak peu ilak badan
Malee that simbhan poma peurati

Abeh geu bungka asoe geureubak
Nyak Muda geujak bak bineh jalan
Geukalon jioh lam hatee ka meusak
Dak jeuet beugeujak samboung piasan

Geuduek meusimpan dimiyup bak jatoe
Mata meupantoe ateueh si lantang
Peugrak lidah sya-e pih mulai geu cawoe
Narit meugantoe keu haloe pandang

Meukru seumangat hai bintang timu
Cahya meusyeuhu seulama masa
Jangeuen lon gantoe ngon nada syahdu
Geunantoe rindu ka meukaleueng dada

Deungo hai angen lon kirem haba
Kisah aneuekda di dalam rantoe
Uroe tan payoung ngon lindong raga
Malam tan kama leupie lam asoe

Wahee e bungong si ayeuem mata
Lam doa lon ba bak tiep- tiep uroe
Han leukang rihoun meusiklap mata
Meunan hai haba ulon peusampoe

Sinoe bak mata meukaleueng buleuen
Ceudah jeut ta kheuen meubanggi rasa
Kiban keuh lon kira haba meujangeun
Seunue ulon kheuen rihoun si jeumpa

Lon kalon buleuen kon meubalek rasa
Jioh bak kada hana lon tamsee
Ta peutrouh hai angen keu po meujeumba
Haba peuneuba keu bungong sitangkee

MEUSAMBONG

Bek tuwoe neubaca chit ata awai mangat meuho uram ngon ikue;