Kaphe Beulanda bangsa penjajah
Sukee nyang juah siputeh mata
Ka jeum teukeudi neubri le Allah
Seuramoe Mekkah kaphe peu cama
Padum treb sabe lam kaphe jajah
Kheundak po Tallah dudoe meutuka
Jiteuka Jeupang keunoe jilangkah
Leubeh lom juah leubeh bak nyangka
Ci t katamaklum bandum pih sosah
Han peu lon peugah cit ban baroe sa
Nyang jeut sengsara neubri le Allah
Jeupang nyang juah Bom atom seuba
Oh talo Jeupang sibarang sudah
Neubri Le Allah tanyoe Merdeka
Habeh dum reule rante peunjajah
Deungon apuwah Soekarno-Hatta
Indonesia bangsa nyang ceudah
Aceh pih meugah meutamah nama
Sabab na pangkai Kapai Seulawah
Nyang jeut geu arah Modal Pertama
Laen nibak nyan han pue lon peugah
Aceh geuarah sukee perkasa
Ci t hana saket bak let peunjajah
Darah ngon gapah tajok keubangsa
Peudeung meusarong Rincong meutatah
Badek ngon siwah yoh nyan keuluwa
Rakyat Gurilla rata daerah
Seu uem that darah pahlawan bangsa
Talo Beulanda neubri le Allah
Aceh ka sudah jipulang tahta
Geutanyoe Aceh leubeh lom meugah
Sa bah han leupah jicok le Nica
Meunan meu ceurut bacut lon peugah
Lon kheun seujarah meuduwa banja
Nibak masa nyoe neubri le Allah
Aceh lom meugah geutamah nama
Geuseubot nama le Peumeurintah
Geukheun daerah nyan Istimewa
Unsur syriat nekmat Potallah
Jinoe pih kasah geukheun meuguna
Meukru seumanagat Rahmat that limpan
Syeuko ke Allah geutanyoe dumna
Nanggroe Aceh nyoe Seuramoe Mekkah
Meugisa tuwah Allah karonya
Gunong Geureudong lambong meuleupah
Geunong Seulawah nyang la bang donya
Hoka wareh lon kawom nyang meugah
Ban saboh daerah nyang fetimewa
Beudoh bersatu teungku meutuwah
Seuramoe Mekkah tapeugleh teuma
Bathen ngon lahe hate Ikhelah
Tulong Potallah ateuh buet beuna
Nanggroe Aceh nyoe ta puwoe tuwah
Lagee seujarah riwayat lama
Meunan meukeusud bacut lon peugah
Ubah Potallah tamohon do'a
Pakon ek talet kaphe peunjajah
Sapeu peuneugah sa ma sibangsa
Cuba takalon rakan meutuwah
Le that sejarah Aceh neubaqa
Yoh phon Merdeka lon cuba peugah
Bak manoe darah reubot Merdeka
Tabri ngon pangkai kapai Seulawah
Aceh nyang seurah nomor sa dua
Limong pion kilo meun yum breuh ngon geutah
Peusapat bagah modal pertama
Bukon saudara haba beurakah
Lapangan Gajah jak ngieng di Banda
Kapai teureubang Merek Seulawah
Saboh geukeubah sideh di jawa
Di Aceh saboh keunoe geukeubah
Untok seujarah Aceh meuleuha
Maka deungon nyoe adoe meutuwah
Dalam seujarah beu mephom gata
Aceh nyoe kaya nama pih meugah
Meubek meutuwah gata peuhina
Peungot nanggroe droe adoe meutuwah
Le peumeurintah geuyue uasaha
Tapubuet suroh peujeuoh teugah
Aceh nyang meugah beutatem jaga
Pakon lawet nyoe jinoe meu ubah
Seuramoe Mekkah tatem peu cama
Hana le meuri aneuk ngon ayah
Ka le meu ubah agam ngon dara
Maken got maju laju that parah
Maken got meugah maken got gura
J i deungo hana meu ma ngon ayah
Peulom tapeugah haba ulama
Seudang nanggroe nyoe Seuramoe Mekkah
Nanggroe meutuwah Peusaka kaya
Asoe Seuramoe jinoe kaceudah
Pingan ngon capah hanle di bara
Tika meu si seu aleu kapatah
Bate Kabicah hanco ceurana
Ranub habeh tho hanco ngon bicah
Seuramoe patah soe salah mula ?
Soe nyang peuhanco rakan meutuwah
Pue gob peubicah atao droe gata
Pakon reumoh droe tatem peupatah
Beudoh meutuwah jak peugot sigra
Syariat Islam geupulang kasah
Le peumeurintah di Aceh kana
Teutapi pakon rakan meutuwah
Syariat takeubah han tapeunguna
Adatdi Aceh ka meukleh leupah
Pue lom lon peugah bidang agama
Nyang le soe pakaek adoe meutuwah
Cut putroe ceudah nyang dua muka
Aci si leuhok nyan cocok leupah
Puelom tapeugah ek lhee ek dua
Meugreb ngon Insya hana pue peugah
Ka lale leupah bak adu mata
