Pula nga Alindanaw
<•••>
Galupad-lupad ka sa hanaw nga luna,
Samtang ako gatabis,
Gatabis sa imung pulang kaanyag,
Dayun nahigugma ka sa namuswak
nga hagunoy,
Samtang ako gataak-taak na
sa hanaw nga luna,
Ikaw gidakup,
Gihigtan,
Gadagan-dagan,
Ug kalipay,
Kalipay akong namatngunan,
Samtang ikaw gahilak,
sa akong kiliran
Pinikas
<•••>
Nalimtan na siguro nimu ang tanan. Ang ikaw. Siya. Sila. Ako.
Kadtong mga oras nga gebayaw ka sa kalipay. Basin siguro nangalimtan mo na. Ug wa naka kahibaw kon mubalik pa ba; ang tanan. Mabdos na ang tanang bulok ug nanganak nag-itom.
Nagtikaw-tikaw na ka sa luna sa kawad-on.
Apan, andam kong pikason ning akong kasing-kasing. Una para mubalik kang mahigugma. Ug ang usang pikas, para higugmaon tika.